Mektep balanyń óz úıindeı bolýy kerek – Prezıdent bala tárbıesi týraly
ASTANA. KAZINFORM – Memleket basshysy Qasym-Jomart Toqaev mektepterdi tek bilim beretin oryn emes, bala tárbıesi men jańa qoǵamdyq mádenıetti qalyptastyratyn ortaǵa aınaldyrý qajet ekenin aıtty. Oqýshylar mektepke zor yntamen baryp, ony bilim alatyn, dostarymen aralasatyn ári balalyq shaǵy ótetin «óz úıindeı» qabyldaýy kerektigi aıtyldy.
Respýblıkalyq Tamyz konferentsııasynda Prezıdent bala tárbıesi máselesine basa mán berý qajettigin atap ótti. Qoǵamda zań men tártipke, tazalyqqa, mádenıettilikke negizdelgen jańa etıka qalyptastyrý isi dál osy mańyzdy mıssııany júzege asyrýdan bastalady.
– Qazir elimizde 7 mıllıonǵa jýyq bala bar. Jastarmen qosa eseptegende olardyń úlesi halyq sanynyń jartysyna jýyqtaıdy. Elimizdiń keleshegi jarqyn bolsyn desek, eń aldymen, ulaǵatty urpaq tárbıeleýimiz kerek. Jastardyń boıyna otanshyldyq, bilimpazdyq, eńbekqorlyq qundylyqtaryn sińirýimiz qajet. Áıtpese, salynǵan mektepterden, bilim salasyndaǵy ınnovatsııalyq sheshimderden esh nátıje bolmasy anyq, – dedi Memleket basshysy.
Bul turǵydan alǵanda, oqý-aǵartý salasy aıryqsha ról atqaratyny barshaǵa málim.
– Mektepter sapaly bilimmen qatar taǵylymdy tárbıeniń oshaǵy bolýy kerek. Balalar mektepke zor yntamen barýy qajet. Olar mektepti bilim alatyn, qurdastarymen aralasatyn jáne ómirindegi eń tamasha jyldardy – balalyq pen jastyq shaqtyń shynaıy ǵajap kezeńderin ótkizetin óz úıindeı qabyldaýǵa tıis. Qalaı bolǵanda da, jaǵdaı dál solaı bolýy qajet, – dedi Qasym-Jomart Toqaev.
Buǵan deıin Memleket basshysy mektepterge JI engizý tapsyrmasy tıisti deńgeıde oryndalmaǵanyn synaǵan edi. Prezıdent balalar men pedagogterdiń JI-di durys ári júıeli qoldaný tártibin belgileıtin pármendi sharalardy shuǵyl qabyldaýdy tapsyrdy.
Sondaı-aq Prezıdent áleýmettik jelide bilim berý salasyna qatysty negizsiz daý-damaı men aıqaı-shýdyń kóbeıgenin synǵa aldy.
