Mektep baǵdarlamasyna QR Konstıtýtsııasyn oqytý boıynsha saǵattar engizip, aksaqaldar alqasyn qaıta damytý kerek - professor S.Ospanov

ALMATY. 29 tamyz. QazAqparat - Aýyl turǵyndarynyń daýlaryn sotqa jetkizbeı sheshetin aksaqaldar alqasyn qaıta damytý kerek, dedi búgin «Konstıtýtsııa - meniń aıbynym» taqyrybynda ótken «dóńgelek ústel» jıyny barysynda Qazaq memlekettik qyzdar pedagogıkalyq ýnıversıteti janyndaǵy áleýmettik jáne genderlik zertteýler Ǵylymı-zertteý ınstıtýtynyń jetekshi ǵylymı qyzmetkeri, fılosofııa ǵylymynyń doktory Sapar Ospanov.

Professordyń aıtýynsha, elde jyl saıyn qylmystylyq artyp keledi, kún saıyn azamattar quqyq buzady, sottyń isteriniń sany artyp keledi. «Bul keıbir azamattardyń konstıtýtsııalyq normalardy saqtamaýynyń, Negizgi Zańdy meńgermeýiniń saldarynan týyndaıdy dep esepteımin», - dedi ol.

«Alǵashqy memlekettik zań - Jeti jarǵynyń tarıhynan mysal keltirgen saıyn onyń eskirgenin tilge tıek etemiz. Desek te óz Konstıtýtsııamyzdyń negizi Jeti jarǵyda jatyr emes pe?! Dinge de baılanysty sony aıtýǵa bolady. Din jáne Konstıtýtsııa memlekettik tártiptiń ornaýynda birdeı qyzmet atqarady. Din bizdi adal oılaýǵa, nıetimizdiń taza bolýyna úıretedi», - dep basa aıtty ǵalym.

«Men kóptegen áriptesterimniń 5-synyptan bastap, mektep baǵdarlamasyna Germanııadaǵydaı pedagogıkalyq baǵytta Konstıtýtsııany meńgerý boıynsha belgili bir saǵat kólemin engizý týraly ıdeıalaryn qoldaımyn. Jáne óz azamattarymyzdy Konstıtýtsııany qurmetteýge jáne saqtaýǵa shaqyramyn.», - dep qorytty S.Ospanov.