Mektep baǵdarlamasyna jańa mindetti pánder engizildi
ASTANA. KAZINFORM — QR Oqý-aǵartý mınıstri Juldyz Súleımenova Úkimet otyrysynda mektepke deıingi jáne bastaýysh bilim berý salasyndaǵy keshendi jospar men jańartýlar týraly baıandady.
— Osy negizde 2026-2028 jyldarǵa arnalǵan mektepke deıingi jáne bastaýysh bilim berýdi damytýdyń keshendi jospary ázirlendi. Negizgi basymdyqtardyń biri mektepke deıingi tárbıe jáne oqytýmen qamtýdyń jumysyn keńeıtý, — dedi mınıstr.
Onyń aıtýynsha, bastaýysh bilim berý júıesinde eleýli ózgerister engizilgen.
— Sebebi alǵash ret bizdiń jańa Konstıtýtsııada bastaýysh bilim konstıtýtsııalyq mártebege ıe boldy. Osy negizde balalardyń jas erekshelikteri eskerile otyryp, oqý baǵdarlamalarynyń mazmuny keshendi túrde qaıta qarastyryldy, — dedi Juldyz Súleımenova.
Mınıstr bastaýysh synyptardaǵy matematıka páni boıynsha ózgeristerge toqtaldy.
— Atap aıtar bolsaq, 1-4 synyptarǵa arnalǵan matematıka páni boıynsha 244 oqý maqsaty tolyq qaıta qaraldy. Onyń ishinde oqýshylardyń jas erekshelikterine sáıkes kelmeıtin birqatar maqsattar alyp tastaldy, birqatar maqsattar joǵary synyptarǵa aýystyryldy. Sonymen birge pánniń praktıkalyq baǵyty kúsheıtildi, kúrdeli teorııalyq taqyryptardyń kólemi qysqartyldy jáne oqý jylynyń basy men sońynda ótkendi qaıtalaý bólimderi saǵattarmen engizildi. 1-synyp oqýshylary úshin beıimdelý kezeńi engizildi. Bul ártúrli daıyndyq deńgeıimen kelgen búldirshinderimizdiń bilim berý protsesine jeńil beıimdelýine, sanaý, oqý jáne jazý daǵdylaryn júıeli qalyptastyrýǵa zor múmkindik beredi, — dedi ol.
Sonymen qatar spıker tildik pánder boıynsha da jańartýlar bar ekenin atap ótti.
— Tildik pánderdiń mazmuny aıtarlyqtaı jańartyldy. Álippege deıingi kezeń 12 saǵatqa uzartyldy. Álippe pánin oqýǵa 84 saǵat bólindi. Sonymen birge «Ana tili» páni ekinshi jartyjyldyqta 102 saǵat kóleminde oqytylatyn bolady. Oqý baǵdarlamalarynda aýyzsha sóıleý mádenıeti, kommýnıkatsııany damytý, mátindi túsinip túısiný oqýy, oqyrman saýattylyǵy men jazbasha kommýnıkatsııa daǵdylaryn damytýǵa baǵyttalǵan tapsyrmalar kúsheıtildi, — dedi mınıstr.
Onyń aıtýynsha, bilim berý mazmuny jańa talaptarǵa saı jańartylyp jatyr.
— Budan bólek, tutastaı alǵanda mektepke deıingi jáne bastaýysh bilim jańa konstıtýtsııalyq bilim berý saıasatynyń berik irgetasyna aınalýy úshin bul sapaly bastaýyshty bilim sapaly orta bilimniń, al sapaly orta bilim eldiń básekege qabiletti adam kapıtalynyń negizine aınalýy tıis, — dedi Juldyz Súleımenova.
Sondaı-aq mınıstr jańa oqý jylynan bastap engizilgen mindetti pánderge toqtaldy.
— Jańa oqý jylynan bastap bilim berý mazmunyna birqatar jańa mindetti kýrstar tolyqtyryldy. Bul 5-7 synyp oqýshylary úshin «Konstıtýtsııa negizderi» páni, 8-11 synyptarda «Zań jáne tártip» mindetti kýrsy, 5-11 synyptarda «Jeke qaýipsizdik» mindetti kýrsy engizildi. Kelesi oqý jylynan bastap 8-9 synyptarda «Qazaqstan geografııasy» páni qaıta engizildi. Buǵan deıin tańdaý páni retinde júrgizilgen «Quqyq negizderi» endigi ýaqyttan bastap barlyq oqýshylarymyz úshin mindetti pánge aınaldy. Jańa Konstıtýtsııanyń qaǵıdattaryna tolyq sáıkestendirilip, jańa mazmunda oqytylatyn bolady, — dep tolyqtyrdy mınıstr.
Buǵan deıin Qazaqstanda eń tómengi jalaqyny arttyrý máselesi qaralatynyn jazǵanbyz.
