Mektep, aýrýhana jáne HQKO-daǵy jemqorlyqty tekserýge erekshe nazar aýdarylady
ASTANA. KAZINFORM – Májilis depýtaty Aıdos Sarym sybaılas jemqorlyq úshin laýazymdy adamdar men zańdy tulǵalardyń jaýapkershiligin kúsheıtý týraly suraqqa jaýap berdi.
- Májiliste qaralǵan zań jobasy aıasynda laýazymdy adamdar jemqorlyqqa tosqaýyl qoıa almasa, oǵan qatysty tártiptik jaza engizilip jatyr. Sonymen qatar, zańdy tulǵalar da qomaqty somada aıyppul tóleıtin bolady. Máselen, mekemede qylmys deregi anyqtalsa, artynan tıisti is qozǵalady. Úlken jańalyqtyń biri – bolashaqta memlekettik qyzmetke jáne kvazımemlekettik sektorǵa keletin basshylar komplaens-qyzmetine arnaıy óziniń jeke múddesi týraly deklaratsııa tapsyrady. Onda týǵan jeri, quda-jekjatyn, týystaryn atap kórsetip, atqarǵan kompanııalaryn ári qyzmettesterin tizip shyǵyp, tolyq málimetti kórsetedi. «Bolashaqta osy kompanııalardan adamdar kelse, tender ótkenge deıin ózimniń jumysymdy toqtatamyn» dep mindetteme alýy kerek. Al osy qujatty ýaqytynda tapsyrmaǵany nemese burmalaǵany úshin jakershilik bar, - dedi A. Sarym Májilistiń jalpy otyrysynan keıin tilshiler suraǵyna jaýap bere otyryp.
Onyń paıymynsha, jańa normalar adamdardy topyrlatyp túrmege jabýdy emes, qoǵamda durys mádenıetti qalyptastyrýǵa baǵyttalǵan.
- Zań jobasyn bir jyldan astam ýaqyt talqyladyq. Eń kóp shaǵym memlekettik qyzmetke emes, mektep pen aýrýhanalarǵa, halyqqa qyzmet kórsetý ortalyqtaryna qatysty bolǵany anyqtaldy. Olar buǵan deıin jemqorlyqpen kúrestiń aıasyna enbegen sýbektiler retinde sanaldy. Buryn agenttik negizinen memlekettik qyzmet, ulttyq kompanııalarmen shektelgen. Endi atalǵan mektep, arýhana jáne HQKO sııaqty sanattardy da QR Sybaılas jemqorlyqqa qarsy is-qımyl agenttigi keńinen qamtıdy. ıAǵnı olardan tıisti deńgeıde suraý bolady. Zań qabyldanǵanan keıin, Úkimet kóptegen normatıvtik aktilerdi bekitýi kerek. Osy jumystarda birlese jumys istep, Parlamenttik baqylaý bolady, - dedi depýtat.
Buǵan deıin habarlanǵandaı, búgin Májilistiń jalpy otyrysynda «Qazaqstan Respýblıkasynyń keıbir zańnamalyq aktilerine sybaılas jemqorlyqqa qarsy is-qımyl máseleleri boıynsha ózgerister men tolyqtyrýlar engizý týraly» zań jobasy men ilespe qujat birinshi oqylymda maquldandy.
Osy oraıda «Sybaılas jemqorlyqqa qarsy is-qımyl týraly» Zań basshylarǵa tártiptik jaza qoldaný úshin «sybaılas jemqorlyq quqyq buzýshylyqtar jasaýǵa yqpal etetin sebepter men jaǵdaılardy joımaý» sııaqty negizdememen tolyqtyrylady.
Zańdy tulǵalardyń jemqorlyq qylmystaryna jaýapkershiligi kúsheıtiledi.
Memlekettik laýazymǵa nemese oǵan teńestirilgen laýazymǵa ornalasatyn adam jumys orny boıynsha kadr qyzmetine jeke múddeleri týraly deklaratsııany tapsyrýy kerek.