Mektep ashanasyn jalǵa alǵan kásipkerler qyzmet sapasyn jaqsartýǵa qulyqsyz
ATYRAÝ. QazAqparat - «Nur Otan» partııasy Atyraý oblystyq fılıaly janyndaǵy partııalyq baqylaý komıssııasy birneshe mekteptiń ashanasyn aralap, jaı-kúıimen tanysty, dep habarlaıdy QazAqparat tilshisi.
Búginde oblys boıynsha jalpy bilim beretin 180 mektepte ystyq tamaq uıymdastyrylǵan. Olardyń 168-i - ashana, 12-si - býfettik qyzmet kórsetedi. Barlyǵy 61 388 oqýshy tegin ystyq tamaqpen qamtylǵan.
Mektep ashanalaryn jalǵa alyp otyrǵan kásipkerlermen kezdesken komıssııa músheleri endi ashanalar biryńǵaı standart boıynsha arnaıy qondyrǵylarmen jabdyqtalatynyn, as máziri memlekettik standart negizinde daıyndalatynyn túsindirdi.
«Nur Otan» partııasy Atyraý oblystyq fılıalynyń partııalyq baqylaý ınspektory Jasqyran Jalmuhanov Elbasynyń partııa jumysyn jańǵyrtý jónindegi tapsyrmasy boıynsha qolǵa alynǵan partııalyq jobalardyń kásipkerlikti damytýǵa, memlekettik-jekemenshik seriktestikti keńeıtýge zor múmkindik berip otyrǵanyn, «Mektep ashanalaryn jańǵyrtý» partııalyq jobasynyń mańyzyn aıtty.
«Balalardyń durys tamaqtanyp, deni saý bolýy - eń mańyzdy másele. Degenmen, keıbir mektep ashanalarynyń jumysynda as mázirinen bastap, onyń quramy, qyzmet sapasynda olqylyqtar bar ekeni anyq. Osy kemshilikterdi túzetip, barlyq mektepterge ortaq biryńǵaı standart daıyndap, ashana jumysyn sol talaptarǵa saı júrgizý qajet», - dedi Jasqyran Jalmuhanov.
Sondaı-aq partııalyq baqylaý ınspektory mektep ashanalarynyń durys jumys isteýine olardy jalǵa alý merziminiń de áser etetinin jetkizdi.
Qazir mektep ashanasyn jalǵa alyp otyrǵan kásipkerdiń kelesi jyly da sol jerde jumys isteıtinine eshqandaı kepildik joq. Sondyqtan, olar jańa qondyrǵylar alyp, qyzmet sapasyn jaqsartýǵa qulyqsyz bolyp otyr. Eger uzaqmerzimdi kelisimmen jumys jasaıtyn bolsa, jaǵdaı oń baǵytta ózgereri anyq.
