Mektep ashanasy: allergııasy bar balalardyń dıetalyq erekshelikteri eskeriledi
ASTANA. KAZINFORM – Densaýlyq saqtaý mınıstrligi Premer-mınıstrdiń tapsyrmasy boıynsha Oqý-aǵartý mınıstrligimen, Qazaq taǵamtaný akademııasymen, ıÝNISEF jáne DDU-men birlesip 2025 jylǵy 1 qyrkúıekten bastap kúshine enetin mekteptegi tamaqtanýdyń jańa standarty men kóp nusqaly úlgilik mázirdi ázirlep, bekitti.
— Mázir balalardyń fızıologııalyq qajettilikteri men kalorııasyn eskere otyryp jasalǵan, onda jas sanattary, maýsymdyq, sondaı-aq as blogy joq mektepterdegi balalardyń tamaqtanýy eskerilgen. Standart sondaı-aq shaǵyn jınaqtalǵan mektepterde, býfetterde tamaqtanýdy uıymdastyrýǵa jáne qant dıabeti, tamaq allergııasy, tselıakııa aýrýy, laktoza jetkiliksizdigi jáne basqa da aýrýlar sııaqty erekshe dıetalyq qajettilikteri bar balalardy tamaqtandyrýǵa qoıylatyn talaptardy qamtıdy, — dedi DSM Sanıtarııalyq-epıdemıologııalyq baqylaý komıteti tóraǵasynyń orynbasary Roza Qojapova búgin Mańǵystaý oblysynda ótken keńeste sóılegen sózinde.
Qujat mektepke deıingi, orta, tehnıkalyq jáne kásiptik, sondaı-aq bilim berý-saýyqtyrý uıymdarynda tamaqtanýdy uıymdastyrýdyń biryńǵaı tásilderin qalyptastyrýǵa baǵyttalǵan.
Jańa standartqa sáıkes dıetada qant, tuz jáne maı mólsheri edáýir azaıady, quramynda tabıǵı emes ónimder men tuz ben qant kóp bolatyn ónimder (shujyq ónimderi, ystalǵan et, qant qosylǵan shyryndar, spredter, dám men ıisti kúsheıtkishi bar ónimder jáne t. b.) alynyp tastalady, jańa pisken kókónisterdiń, jemisterdiń jáne tabıǵı ónimderdiń úlesi artady.
DSM málimetinshe as blogy joq shaǵyn jınaqtalǵan mektepterde ystyq býterbrodtan, ashytylǵan sút óniminen (ıogýrt), maýsymdyq jemisterden jáne sýsynnan (sút, aıran, ıtmuryn sýsyny, keptirilgen jemister, jıdekterden) turatyn lanch-paketter daıyndalady.
Qazirgi ýaqytta mektep ákimshilikterin, medıtsına qyzmetkerlerin, tamaqtaný qyzmetterin jetkizýshilerdi jáne brakerajdyq komıssııanyń múshelerin onlaın oqytý júrgizilip jatyr. Keıinnen mektepke deıingi balalar uıymdarynyń qyzmetkerlerin oqytý josparlanǵan.
Ázirlengen mázir Sanepıdbaqylaý komıtetiniń resmı saıtynda ornalastyryldy jáne bilim basqarmalary men bıznes sýbektilerin habardar etý úshin Oqý-aǵartý mınıstrligine jiberildi.
Aıta ketelik mınıstr mektep ashanalarynda jıi buzylatyn zań buzýshylyqtardy ataǵan edi.