Mektep ashanalarynyń 20 paıyzdan astamy talaptarǵa saı emes - Densaýlyq mınıstrligi

ASTANA. 19 qarasha. QazAqparat - Mektep ashanaoarynyń 20 paıyzdan astamy talapqa saı jumys istemeı otyr. Olardyń deni materıaldyq-tehnıkalyq jaraqtandyrý men taǵam mólsherin qalyptastyrýǵa qatysty buzýshylyqtarǵa baryp otyr. Bul Densaýlyq saqtaý mınıstrligi tarapynan júrgizilgen tekserýler barysynda anyqtalǵan. Búgin Májiliste «Nur Otan» partııasy fraktsııasy janyndaǵy Áleýmettik keńes otyrysynda mekteptegi balanyń tamaǵyn uıymdastyrý máselesin talqylaý barysynda Densaýlyq saqtaý vıtse-mınıstri Erik Baıjúnisov osylaı málim etti.

Vıtse-mınıstrdiń aıtýynsha, búgingi tańda ystyq tamaqpen qamtý respýblıkanyń 360 aýyldyq az jıyntyqty mektepterinde uıymdastyrylǵan. Budan bólek, Qazaqstan mektepteriniń 18,8 paıyzy ǵana jańa tehnologııalyq qondyrǵylarmen jabdyqtalyp otyr.

«Tekserister barysynda anyqtalǵanyndaı, respýblıka boıynsha mektepterdiń ortasha alǵanda 6,7 paıyzynda ystyq tamaqpen qamtý barysyndaǵy qunarlylyq talapqa saı emes. Alaıda bul kórsetkish Almaty qalasynda 40 paıyzǵa jetse, Astanada - 28 paıyz, Batys Qazaqstan oblysynda - 21 paıyz»,- deıdi vıtse-mınıstr. Budan bólek, vıtse-mınıstr mektepterdegi aýyz sý sapasynyń da tıisti deńgeıde bolmaıtynyn aıtty. Onyń sózine qaraǵanda, respýblıka mektepteriniń 2 paıyzynda sý mıkrobıologııalyq kórsetkishterge saı emes.

«Mektep ashanalarynyń 60,5 paıyzy jeke kásipkerlermen jalǵa alynǵan. Kelesi problemaly máseleniń biri jalǵa alǵan kásipkerlerdiń jıi aýysýyna qatysty bolyp otyr. Olardyń jylyna 2-3 ret aýysýyna baılanysty tirkeý josparyna engizý de múmkin bolmaı keledi. Sondyqtan da, qazirgi tańda mektep ashanalarynyń 15,6 paıyzyn nemese 544-in áli teksere almaı otyrmyz. Al josparly tekserýlerge kelsek, respýblıka mektepteriniń 20 paıyzynda ashana talapqa saı jumys jasamaıdy. Soǵan qatysty 1710 laýazymdy tulǵa ákimshilik jaýapkershilikke tartyldy, buzýshylyqty joıýǵa qatysty 1187 usynym jazylyp, sotqa 30 is joldandy. 247 adam jumystan shettetildi», - deıdi vıtse-mınıstr.