Mektep ashanalarynda qanty men tuzy kóp taǵamdar bolmaıdy

ASTANA. KAZINFORM – Mektep ashanalarynda kókónis pen jemister, sút ónimderi kóbirek usynylady. Bul týraly Densaýlyq saqtaý mınıstri Aqmaral Álnazarova málim etti.

- Bıyl 312 mektep pen mektep ashanalaryna tekserý júrgizildi, bul mektepterdiń 4 paıyzy ǵana. Jalpy, tekserý nátıjeleri boıynsha 246 nusqama berildi, 117 adam jalpy somasy 31 mln teńgeden astam somaǵa ákimshilik jaýapkershilikke tartyldy. Sonymen qatar 90 qyzmetker jumystan shettetildi, sotqa 8 materıal jiberildi, - dedi A. Álnazarova Úkimet otyrysynda.

Onyń aıtýynsha, jyl saıyn mektepterdiń jańa oqý jylyna daıyndyǵyna monıtorıng júrgiziledi. Qazir 2 myńǵa jýyq mektep monıtorıngpen qamtyldy. Mınıstrlik memlekettik bıýdjetten qarjylandyrylatyn balalar obektilerinde memlekettik baqylaýdy kúsheıtý boıynsha jańa tásilderdi ázirledi.

- 2025 jyldyń 1 qyrkúıeginen bastap bilim berý uıymdarynda jańa Tamaqtaný standarty engiziledi. Standart durys tamaqtanýǵa qoıylatyn zamanaýı halyqaralyq talaptardy eskere otyryp ázirlengen jáne qantty tutynýdy 3,6 esege deıin, tuzdy 5 esege deıin azaıtýdy, sondaı-aq kókónister, jemister men sút ónimderin tutynýdy arttyrýdy kózdeıdi. Standart shaǵyn jınaqty mektepterde, býfetterde tamaqtanýdy uıymdastyrýǵa jáne arnaıy dıetalyq qajettilikteri bar balalardyń tamaqtanýyna qoıylatyn talaptardy qamtıdy. Tamaqtaný standartyn iske asyrý úshin mektepte tamaqtanýǵa arnalǵan birneshe nusqaly úlgilik standartty as máziri ázirlendi, alǵash ret ystyq taǵam ázirleýge múmkindigi joq shaǵyn jınaqty mektepterge arnalǵan mázir jasaldy, - dedi mınıstr.

Eske salsaq, mektepte oqýshylardy tamaqtandyrýǵa qatysty ózgerister qabyldanǵanyn jazǵan edik.