Mektep ashanalarynda qant 3,6 esege, tuz 5 esege azaıdy
ASTANA. KAZINFORM — Jańa oqý jylynda bilim berý uıymdary as mázirin ázirleý, azyq-túlik satyp alý, saqtaý jáne taǵam daıyndaý kezinde jańa tamaqtaný standartynyń talaptaryn saqtaýǵa tıis. Bul týraly QR Densaýlyq saqtaý mınıstrligi Sanıtarııalyq-epıdemıologııalyq baqylaý komıtetiniń tóraıymy Sarhat Beısenova málimdedi.
Ortalyq kommýnıkatsııalar qyzmetinde ótken baspasóz konferentsııasynda ol bilim berý uıymdaryndaǵy tamaqtaný talaptaryna toqtaldy.
— Jańa oqý jylynda bilim berý uıymdarynyń barlyǵynda tamaqtaný standartyn mázir ázirleý, azyq-túlik satyp alý, saqtaý jáne daıyndaý kezinde múltiksiz ári júıeli túrde saqtaý qajet, — dedi Sarhat Beısenova.
Onyń aıtýynsha, jańa tamaqtaný standarty 2025 jylǵy 1 qyrkúıekten bastap qoldanysqa engizilgen. Qujat balalardyń durys ári teńgerimdi tamaqtanýyna qatysty zamanaýı usynymdar negizinde ázirlengen.
— Jańa standart boıynsha taǵam quramyndaǵy qant mólsheri 3,6 ese, tuz 5 ese azaıtyldy. Al as mázirindegi kókónis, jemis-jıdek pen sút ónimderiniń úlesi artty, — dedi ol.
Sonymen qatar mázirden shujyq ónimderi, ystalǵan taǵamdar, spredter, quramynda qant pen tuzy kóp ózge de ónimder alynyp tastaldy. Qanty bar sýsyndar men shyryndardyń ornyna sý, sút, qyshqyl sút ónimderi jáne qanty az sýsyndar usynylady.
Jańa standarttyń negizgi maqsaty — balalardyń durys tamaqtaný daǵdysyn qalyptastyryp, semizdik, qant dıabeti, júrek-qan tamyrlary jáne basqa da sozylmaly aýrýlardyń damý qaýpin azaıtý.
Sarhat Beısenovanyń aıtýynsha, 2025 jyly beıindi jáne halyqaralyq sarapshylarmen birlesip, mektepterde bir rettik tamaqtandyrýǵa arnalǵan birneshe nusqaly úlgilik mázir ázirlengen. Olardy ázirleý kezinde balalardyń jasy, taǵamnyń kalorııa mólsheri men maýsymdyq erekshelikter eskerilgen.
Osy úlgilik mázirler negizinde 2025-2026 oqý jylyna elimizdiń barlyq óńirinde perspektıvalyq mázirler bekitildi.
— Tamaqtaný standarty bir rettik shara emes, balalardyń tamaqtanýyn uıymdastyrýdyń turaqty tásili. Belgilengen talaptardy turaqty oryndaý ǵana balalar ratsıonyn saýyqtyrýǵa jáne bolashaqta olardyń densaýlyq kórsetkishterine oń áser etýge múmkindik beredi, — dedi komıtet tóraıymy.
Buǵan deıin elimizde jańa oqý jylyna daıyndyqty baqylaý barysynda 2 087 mektep ashanasynda sanıtarııalyq-epıdemıologııalyq talaptardyń buzylǵany anyqtalǵanyn jazǵan edik.
