Mektep ashanalaryna engizilgen talap: jańa mázir qandaı bolady
ASTANA. KAZINFORM — Elimizde mektep ashanalaryna arnalǵan jańa as máziri bekitilgeli jatyr. Bul týraly «Jibek joly» telearnasyndaǵy «Búgin LIVE» baǵdarlamasynda DSM Sanıtarııalyq-epıdemıologııalyq baqylaý komıtetiniń basqarma basshysy Gúlsharat Qojatova aıtty.
— Densaýlyq saqtaý júıesin damytý úshin mańyzdy maqsat qoıylǵan. Onyń biri — 4-10 jas aralyǵyndaǵy balalar arasynda semizdik deńgeıin tómendetý. Ol úshin mekteptegi balalardyń durys tamaqtanýy asa mańyzdy. Sondyqtan da jańa standart engizilip jatyr. Ony ázirleýge halyqaralyq sarapshylar tartyldy. Onda as mázirinde qanttyń mólsheri 3,6 esege, tuz mólsherin 5 esege tómendetý qarastyrylǵan, — dedi basqarma basshysy.
Sondaı-aq spıker jańa mázir áli naqty bekitilmegenin atap ótti.
— Qazirgi ýaqytta as máziriniń birneshe úlgilik nusqasy daıyndaldy. Olar usynym retinde berilip otyr. Naqty mázirdi ár óńirdiń densaýlyq saqtaý basqarmalary bekitetin bolady. Usynylǵan nusqalardy sol kúıi bekitýge nemese ata-analardyń, balalardyń usynystary boıynsha sol óńirdegi tamaq ónimderiniń assortımentine qaraı tolyqtyrýlar engizýge bolady. Bastysy almastyrylatyn tamaq ónimderiniń qunarlylyǵy talapqa saı bolý kerek. Qazirgi tańda osyny bekitý boıynsha jumys istep jatyrmyz, — dedi Gúlsharat Qojatova.
Aıta keteıik, buǵan deıin Úkimet otyrysynda Densaýlyq saqtaý mınıstri Aqmaral Álnazarova budan bylaı mektep ashanalarynda qanty men tuzy kóp taǵamdar bolmaıtynan aıtqan edi.