Mektep álemin ózgertetin - ustazdar: Elordada halyqaralyq konferentsııa bastaldy
NUR-SULTAN. QazAqparat - Elordada myńnan astam pedagogtyń qatysýymen HІ halyqaralyq ǵylymı-tájirıbelik konferentsııa ótip jatyr, dep habarlaıdy QazAqparat tilshisi.
«Jyl saıyn ótetin bul konferentsııany Nur-Sultan qalasy ákimdigi men «Nazarbaev Zııatkerlik mektepteri» derbes bilim berý uıymy birlese uıymdastyrýda. Konferentsııanyń «Mektep álemin ózgertetin - ustazdar» dep atalý sebebi - bıyl memleket tarapynan ustaz mártebesine úlken kóńil bólinip otyr», - dedi konferentsııanyń ashylý saltanatynda sóz sóılegen Nur-Sultan qalasy ákimi Altaı Kólginov.
Ol Elbasy Nursultan Nazarbaevtyń tapsyrmasyna sáıkes, elimizde alǵash ret pedagog mártebesi týraly zań jobasy ázirlenip jatqanyn da atap ótti.
«Bul sheshimdi qoǵam bolyp quptap otyrmyz. Muǵalimdi qoldaý - bolashaǵymyzdy qoldaý. Memleket basshysy Qasym-Jomart Toqaev bıyl muǵalimderdiń qatysýymen ótken Tamyz keńesinde memlekettiń bilim salasyna erekshe den qoıyp, kóńil aýdaratynyn kórsetti. Muǵalim jalaqysynan bastap materıaldyq-tehnıkalyq baza men jańa mektepter salýǵa qatysty úlken jobalar iske asýda», - dedi elorda ákimi.
Konferentsııaǵa elimizdiń ár óńirinen kelgen muǵalimder, ǵalymdar, bilim mekemeleriniń basshylary, sondaı-aq AQSh, Ulybrıtanııa, Izraıl, Norvegııa, Frantsııa, Ispanııa, Reseı, Túrkııa, jalpy alǵanda 17 memlekettiń ókilderi qatysýda.
