Meksıkanyń tuńǵysh áıel prezıdenti Klaýdııa Sheınbaým ant qabyldady

ASTANA. KAZINFORM – 62 jastaǵy Klaýdııa Sheınbaým resmı túrde Meksıka prezıdenti qyzmetine kiristi. Ulyqtaý rásimi respýblıka Kongresiniń (eki palataly parlament) otyrystary ótip jatqan Mehıkodaǵy San-Lazaro zań shyǵarý saraıynda ótti, dep habarlaıdy TASS aqparat agenttigi.

«Men Meksıka Qurama Shtattarynyń saıası konstıtýtsııasyn jáne odan týyndaıtyn zańdardy saqtaýǵa jáne oryndaýǵa, sondaı-aq odaqtyń ıgiligi men gúldenýi úshin halyq maǵan senip tapsyrǵan Respýblıka Prezıdentiniń mindetterin adal jáne patrıottyqpen oryndaýǵa saltanatty túrde ant etemin. Eger men muny istemesem, ult meni jazalasyn», - dedi Sheınbaým prezıdenttik ant mátinin oqý kezinde.

Osydan keıin ókilettigin aıaqtap jatqan memleket basshysy Andres Manýel Lopes Obradordyń qatysýymen Depýtattar palatasy (tómengi palata) prezıdıýmynyń tóraǵasy Ifıgenııa Martınes Ernandes oǵan prezıdenttik bılik nyshandarynyń biri – Meksıka týynyń tústerindegi prezıdenttik lentany tabys etti.

Klaýdııa Sheınbaým (tolyq aty-jóni Klaýdııa Sheınbaým Pardo) 1962 jyly 24 maýsymda Mehıko qalasynda dúnıege kelgen. Onyń ákesi jaǵynan da, anasy jaǵynan da ata-babalary – Shyǵys Eýropadan kelgen evreı ımmıgranttary. Ákesi bıznesmen jáne ǵylymı ortada tanymal ınjener-hımık bolǵan. Anasy bıolog. 1960 jyldary olar eldegi stýdenttik qozǵalystar men narazylyq aktsııalaryna belsendi qatysqan.

Sheınbaým Meksıkanyń Ulttyq avtonomııalyq ýnıversıtetin (NAUM) fızıka mamandyǵy boıynsha bitirdi, onda energetıka salasyndaǵy magıstr jáne doktorlyq dárejelerin aldy. Ol Kalıfornııa ýnıversıtetiniń Berklı zerthanasynda Meksıkadaǵy energetıkalyq tendentsııalar boıynsha doktorlyq zertteýlerin júrgizdi.

Kazinform úshin arnaıy TASS seriktes agenttigi usynǵan.