Meksıkalyq polıtseıler AQSh-tan kelgen jekpe-jek óneriniń sheberin óltirip tastady
ASTANA. 4 qańtar. QazAqparat - Jekpe-jek óneriniń sheberi AQSh-tyq Ieýdı Estrada Karrero Meksıkanyń Plaııa-del-Karmen atty kýrorttyq qalasynda jergilikti polıtseılerdiń qolynan qaza tabýy múmkin. Bul týraly «RIA Novostı» Kıntana-Roo shtatynyń prokýratýrasyna silteme jasaı otyryp habarlaıdy.
Meksıka bıliginiń derekteri boıynsha, 28 jastaǵy sportshy ózi turyp jatqan úıiniń mańynda patrýldik kóliktiń ishinde tunshyqtyryp óltirgen. Qolyna kisen salynyp, kókala qoıdaı sabalǵan Karreronyń múrdesi polıtsııa kóliginiń júksalǵyshynan tabylǵan.
Qylmystyq is boıynsha, alty polıtsııa qyzmetkeri ustaldy. Olardyń aıtýynsha, Estradanyń úıine kórshilerdiń shaǵymy boıynsha kelgen. Sportshy polıtsııadan qashyp ketpek bolǵan, alaıda ony ustap alǵan. Polıtseılerdiń aıtýynsha, olar bólimshege kelgen soń ǵana Estradanyń ólip qalǵanyn kórgen.
Osyǵan uqsas oqıǵa Meksıkanyń Akapýlko qalasynda da bolǵan. 2012 jyldyń 28 qazanynda reseılik akrobat Anton Alferov qaıtys bolǵan edi. Polıtseıler ony qorǵalatyn aýmaqqa ótip ketkeni úshin ustaǵan. Sol kezdegi habarlamalar boıynsha sportshy tártip saqshylarynan qashý úshin 12 metr bıiktikten sýy joq basseınniń ornyna sekirgen. Alaıda sonda da qolǵa túsip qalǵan. Sosyn qamaýda otyryp basqa ustalǵandarmen tóbelesip, odan keıin ózine ózi qol jumsamaq bolyp, qabyrǵaǵa basyn soqqylaǵan. Gerrero shtatynyń prokýratýrasy Alferov osyndaı qımyl-áreketterimen ózine aýyr jaraqat salyp, sodan kóz jumdy degen sheshimge kelgen bolatyn.
