Meksıkadan jetkiziletin jemis-kókónister Tramp tarıfine baılanysty qymbattaýy múmkin

ASTANA. KAZINFORM – AQSh prezıdenti bolyp saılanǵan Donald Tramp ońtústik shekara arqyly ótetin barlyq taýarlarǵa 25 paıyzdyq baj salyǵyn engizetin bolsa, amerıkalyq tutynýshylar Meksıkadan keletin azyq-túlik ónimderiniń baǵasynyń ósýine tap bolýy múmkin, dep habarlaıdy NBC News. 

Deıvıstegi Kalıfornııa ýnıversıtetiniń málimetinshe, Meksıka – Qurama Shtattarǵa qyzanaq, avokado, tańqýraı, bolgar buryshy jáne qulpynaıdyń jetekshi sheteldik jetkizýshisi. 

AQSh Aýylsharýashylyǵy mınıstrliginiń málimetine sáıkes, Meksıkadan 2022 jyly AQSh-qa kókónis ımportynyń 69%-y jáne jańa pisken jemister ımportynyń 51%-y júzege asyrylǵan. 

2000-2021 jyldar aralyǵynda Meksıkanyń AQSh-qa baý-baqsha eksportynyń quny tórt ese ósti. 
Amerıka turǵyndary sondaı-aq AQSh-ta №1 tanymal Corona jáne Modello syralarynyń qymbattaýyna tap bolýy múmkin.

Meksıka – Qurama Shtattaryna azyq-túlik eksportynyń negizgi kózi, oǵan tómen eńbek shyǵyny (keıde AQSh aýylsharýashyshyǵy qyzmetkerleriniń jalaqysynan bes ese az) jáne jemister men kókónisterdi jyl boıy ósirýge múmkindik beretin qolaıly klımat sebep bolyp otyr. 

Ekonomıster Tramptyń tarıf saıasaty ınflıatsııany týdyrýy múmkin dep alańdaıdy. Osylaısha, «Goldman Sachs» sarapshylary D.Tramptyń josparlaǵan sharalary ınflıatsııanyń 1%-ǵa jýyq ósýine ákeletinin eseptedi. 

Meksıkada óndiris oryndary bar birqatar iri kompanııalardyń AQSh-tyń tarıftik saıasaty áser etýi múmkin ekenin buǵan deıin habarlaǵan bolatynbyz.

Eske sala ketsek, buǵan deıin AQSh-tyń jańadan saılanǵan prezıdenti Donald Tramp óziniń Truth Social platformasynda jarııalaǵan málimdemesinde, prezıdent qyzmetine kirisken alǵashqy kúni, ıaǵnı 20 qańtarda, Qytaı, Meksıka jáne Kanadadan keletin taýarlarǵa jańa tarıfter engizýdi josparlap otyrǵanyn habarlady.