Meksıkadaǵy jantúrshigerlik jol apaty: qaza tapqandar sany 55-ke jetti
MEHIKO. QazAqparat – Meksıkanyń ońtústigindegi Chıapas shtatynda mıgranttardy tasymaldaǵan júk kóliginiń apatqa ushyraýy saldarynan qaza tapqandar sany 55-ke jetti. Bul týraly aımaq gýbernatory Rýtılıo Eskandon Twitter-de jazdy, dep habarlaıdy QazAqparat.
«Keshegi jol apatynan keıin, ókinishke oraı, búgin taǵy bir adam kóz jumdy, qurbandardyń jalpy sany 55-ke jetti», - delingen jazbada. «Federaldy úkimetpen birge biz zardap shekkender men qaza tapqandardyń týystaryna olardyń jalǵyz emes ekendigine kepildik beremiz. Men tıisti kómek berý jaıly tapsyrma berdim».
Jol apatynan 100-den astam adam zardap shekti, olardyń birnesheýi áli aýrýhanada jatyr.
Beısenbi kúni Ortalyq Amerıkanyń birneshe eliniń turǵyndary bolǵan tirkemesi bar júk kóligi Chıapas astanasy Týktla Gýterreske jaqyn jerde tirek qabyrǵaǵa soǵylyp, aýdarylyp qaldy. Kólik júrgizýshisi oqıǵa ornynan qashyp ketken, quqyq qorǵaý organdary ony izdestirip jatyr. Jol apatynan adamdardyń qaza tabýyna baılanysty aımaq prokýratýrasy adam óltirý deregi boıynsha qylmystyq is qozǵady.
Aldyn ala málimet boıynsha, Gvatemala men Gondýrastan kelgen mıgranttar AQSh shekarasyna jetpek bolǵan. Meksıka prezıdenti Andres Manýel Lopes Obrador qaza tapqan sheteldikterdiń týystary men jaqyndaryna kóńil aıtyp, zardap shekkenderge kómek kórsetýdi tapsyrdy. Ol úshin aımaqqa azamattyq qorǵanys kúshteriniń ulttyq úılestirýshisi Laýra Velaskes bastaǵan jumys toby jiberildi.
