Meksıkadaǵy qubyr jarylysynyń qurbandar sany 79-ǵa jetti
ASTANA. QazAqparat - Meksıkanyń Idalgo shtatyndaǵy joǵary qysymdy qubyr jarylysynda 79 adam qaza tapty, dep habarlaıdy QazAqparat El Universal gazetine silteme jasap.
Eldiń densaýlyq mınıstri Horhe Alkosera keminde 79 adam qaza tapty dep málim etti.
Basylymnyń jazýyna qaraǵanda, sońǵy málimetterge sáıkes jarylystan zardap shekken 81 adam medıtsınalyq kómekke júgingen. Al aýrýhanada qazir 66 adam jatyr.
Eske sala ketsek, juma kúni keshke Meksıkada qubyr jarylyp 66 adam qaza tapqanyn buǵan deıin habarlaǵanbyz. Jergilikti turǵyndar janarmaı urlaý úshin joǵary qysymdy qubyrdy zańsyz teskende órt shyǵyp, artynan jarylys bolǵan.
