Meksıkadaǵy atys: 19 adam qaza tapty
MEHIKO. QazAqparat – Meksıkanyń AQSh pen shekaralas Chıýaýa shtatynda qylmystyq toptar arasynda bolǵan atys saldarynan 19 adam qaza tapty, dep habarlaıdy jergilikti BAQ shtat prokýratýrasyna silteme jasap.
«Qarýly qaqtyǵys jaıly habardan soń oqıǵa ornyna jetken qaýipsizdik qyzmeti 18 adamnyń óli denesiniń ústinen shyqty», - dep jazady Milenio basylymy.
Atys saldarynan jaraqattanǵan eki adam Kýaýtemok qalasyndaǵy aýrýhanaǵa jetkizilgen. Biraq olardyń bireýi kóp uzamaı kóz jumdy.
Qaqtyǵys bolǵan jerden 18 atys qarýy, eki granata jáne eki avtomobıl tabyldy. Oqıǵa ornynda shtattyń bas prokýratýrasy men tergeýshileri jáne ekspertter jumys isteýde.
