Meksıkadaǵy aptap ystyq 70 adamnyń ómirin qıyp ketti
ASTANA. QazAqparat - Meksıkanyń Tómengi Kalıfornııa Soltústik shtatyndaǵy Mehıkalı qalasy aýmaǵynda 70-ten astam adam aptap ystyq saldarynan kóz jumdy, dep habarlaıdy TASS.
Milenio gazetiniń jazýynsha, 1-31 shildede aýa temperatýrasynyń joǵary bolýy saldarynan 25-60 jas aralyǵyndaǵy 73 adam aja qushqan, olardyń altaýyna kún ótken. Óńirlik sot-medıtsınalyq saraptama qyzmetiniń úılestirýshisi Sesar Raýl Gonsales Vakanyń sózine qaraǵanda, qaıtys bolǵandardyń kóbisi júrek-qan tamyrlary júıesine, búırek nemese ókpe aýrýlaryna shaldyqqan.
Ótken aptanyń sońynda Meksıkanyń kóptegen óńirlerinde aptap ystyq saldarynan tótenshe jaǵdaı rejimi engizildi. Bul sheshim shtat bıligine azamattarǵa kómek kórsetý úshin arnaıy qor resýrstaryna qol jetkizýge múmkindik berdi.
