Meksıkadaǵy tártipsizdikter kezinde 73 adam qaza tapty
ASTANA. KAZINFORM — Meksıkadaǵy «Halısko jańa býyny» karteli jetekshisiniń óliminen keıin bolǵan tártipsizdik saldarynan 73 adam kóz jumdy. Olardyń arasynda qaýipsizdik kúshteriniń qyzmetkerleri, kartel músheleri boldy degen kúdikke ilingender jáne basqa tulǵalar bar, dep habarlaıdy CBS News.
Meksıkanyń qaýipsizdik mınıstri Omar Garsııa Harfýhtyń aıtýynsha, «Halıskonyń jańa býyny» karteliniń jetekshisi Nemesıo Osegera Servantestiń («El Mencho» degen atpen tanymal) qazasynan keıin Halısko shtatynda alty bólek shabýyl kezinde Ulttyq gvardııanyń 25 áskerı qyzmetkeri qaza taýyp, qylmys jasady degen kúdikke ilingen 30-ǵa jýyq adam jáne kórshiles Mıchoakan shtatynda taǵy tórt adam óltirildi.
Halısko, Mıchoakan jáne Gýanahýato shtattarynyń bıligi jeksenbide kem degende taǵy 14 adam qaza tapqanyn habarlady. Qaza bolǵandar arasynda jeti adam — Ulttyq gvardııanyń áskerı qyzmetkerleri.
Osyǵan deıin Meksıka áskeri Halısko shtatynda kartel jetekshisi El-Menchony óltirgenin habarlaǵan bolatynbyz.
Álemdegi eń izdeýdegi esirtki barondarynyń biri Nemezıo Osegera Servantestiń ólimi Meksıkada qaqtyǵystar men zorlyq-zombylyq tolqynyn týdyrdy.
Halısko shtatynyń Pýerto-Valıarta qalasyndaǵy aımaqtyq túrmeden 23 adam qashyp ketti.
QR Syrtqy ister mınıstrligi jappaı tártipsizdikter oryn alǵan Meksıkadaǵy jaǵdaıǵa baılanysty sol elge barǵan qazaqstandyqtarǵa úndeý jasady.