Meksıkadaǵy jappaı tártipsizdik kezinde túrmeden 23 tutqyn qashyp ketti

ASTANA. KAZINFORM — Halısko shtatynyń Pýerto-Valıarta qalasyndaǵy aımaqtyq túrmeden 23 adam qashyp ketti, dep habarlaıdy Report.

Tutqyndar túrmeden «Halıskonyń jańa býyny» esirtki karteliniń jetekshisi óltirilgennen keıin bastalǵan jappaı tártipsizdikter kezinde qashqan. 

— Qazirgi ýaqytta bas bostandyǵynan aıyrylǵan 23 adamnyń qashyp júrgeni belgili. Olardy ustaý úshin federaldy organdarǵa tıisti habarlamalar jiberildi, — dedi shtattyń qoǵamdyq qaýipsizdik hatshysy Hýan Pablo Ernandes.

Sheneýniktiń aıtýynsha, tártipsizdikter kezinde tutqyndardyń sybaılastary túrmege oq jaýdyryp, keıin kólikpen qaqpany buzyp, mekemege kirgennen keıin sottalǵandar qashyp ketken. Atys kezinde túrme kúzetshileriniń biri qaza tapty.

Buǵan deıin Meksıkanyń Ulttyq qorǵanys mınıstrligi El Mencho degen atpen belgili kartel jetekshisi Rýben Osegera Servantesti óltirý týraly habarlaǵan. Mınıstrliktiń habarlaýynsha, ol qaýipsizdik kúshterimen qaqtyǵys kezinde aýyr jaraqat alyp, áskerı gospıtalge jetkizilgen kezde qaıtys bolǵan.

Arnaıy operatsııadan keıin elde joldar jappaı jabylyp, kólikter men kommertsııalyq nysandarǵa órt qoıylǵany habarlandy. Meksıka prezıdenti Klaýdııa Sheınbaým dúısenbide qoǵamdyq qaýipsizdik jaǵdaıy tolyǵymen baqylaýda ekenin málimdedi.

Aıta keteıik, Meksıka áskeri Halısko shtatynda kartel jetekshisi El-Menchony óltirdi. 

Meksıkadaǵy tártipsizdikke baılanysty QR Syrtqy ister mınıstrligi qazaqstandyqtarǵa úndeý jasady. Qazir bul elde baqylaý beketteri ornatylyp, áýe reısteri ýaqytsha toqtatyldy. Al bılik turǵyndardy jaǵdaı turaqtanǵansha úıde bolýǵa shaqyrdy.