Meksıkadaǵy sý tasqynynan 75 adam iz-túzsiz joǵaldy

ASTANA. KAZINFORM — Meksıkada sý tasqyny 70 adamnyń ómirin qıdy. Aman qalǵandar shuǵyl kómek suraıdy, dep habarlaıdy ANEWZ.

Meksıkanyń ortalyq jáne shyǵys bóligindegi alapat sý tasqyny 70 adamnyń ómirin qıyp, 75 adam iz-túzsiz joǵalyp ketti. Munda myńdaǵan adam baspanasyz qaldy. Aman qalǵandar laı men qoqys basqan kóshelerde júrip, úkimetten kómek surap jatyr.

Nóser jańbyr men sý tasqyny saldarynan bolǵan tabıǵı apat Verakrýs, Idalgo, Pýebla jáne Keretaro shtattaryna qatty áser etti. Eń aýyr zardap Verakrýsta boldy. Qyzy men nemeresin úsh kún boıy izdegen Krýz Ernandes sııaqty otbasylar kómektiń keshigýine qynjyldy.

— Úkimettiń bizdi qoldap, týystaryn taba almaı júrgen adamdarǵa kómekteskenin qalaımyn. Ana retinde men mundaı jaǵdaıdy buryn da bastan ótkerdim, — dedi turǵyn Ernandes. 

Sý tasqynynan aman qalǵan turǵyndar úılerimen qosa, densaýlyqtarynan da aıyrylyp jatyr. Turǵyn Anhel Leıva shirigen qoqys pen turyp qalǵan sýdan keletin qaýipter týraly eskertti.

— Aınalamyzda qoqys kóp. Shirigen ıis, sasyǵan mal qaptap tur. Teri sańyraýqulaǵy, qandy gemorragııalyq qyzba, Zıka vırýsy syndy túrli aýrý kóp. Bizge dárigerler múldem kelgen joq. Olardy kútip otyrmyz. Bizdiń balalarymyz bar, — dedi Leıva.

Meksıka Áskerı-teńiz kúshteri men eriktiler bólimsheleri kómek retinde aýyz sý, tósenishter men kórpe-tósek jáne tazalyq quraldaryn jetkizip jatyr. Kósheler laı jáne qoqysqa toly, al mototsıklder men jaıaý júrginshiler qaýipti jaǵdaıda júrýge májbúr.

Prezıdent Klaýdııa Sheınbaým qaıtys bolǵandar men iz-túzsiz joǵalǵandar sanyn rastady.

Búgingi kúni 70 adam qaıtys boldy. Verakrýsta - 30, Idalgoda - 21, Pýeblada - 18 jáne Keretaroda bir adam. 75 adam iz-túzsiz joǵalǵandar qatarynda. Aıta ketý kerek, birneshe adam tabyldy. Joǵalǵan turǵyndardy jaqyndary taba almady.

Bılik qutqarý jáne kómek kórsetý jumystaryn úılestirip jatyr. Alaıda sý tasqyny saldarynan jalǵasyp jatqan qıraýlar tótenshe jaǵdaıǵa daıyndyqtyń joqtyǵyn kórsetti. Aman qalǵandar tezirek shara qoldanýdy suraıdy.

Aıta keteıik, Meksıkada nóser jaýyn saldarynan bolǵan sý tasqynynan qaza bolǵandar sany kúnnen kúnge kóbeıip keledi.