Meksıkadaǵy prezıdenttik saılaýda Klaýdııa Sheınbaým jeńiske jetti

ASTANA. KAZINFORM – Tarıhta alǵash ret áıel adam Meksıka prezıdenti bolady: jeksenbide ótken saılaýda ekzıt-poll qorytyndysy boıynsha Mehıkonyń burynǵy meri jáne qazirgi prezıdenttiń protejesi Klaýdııa Sheınbaým senimdi túrde jeńiske jetýde, dep habarlaıdy BBC.

Parametria kompanııasy júrgizgen ekzıt-poll kórsetkendeı, saılaýshylardyń 56 paıyzy Klaýdııa Sheınbaýmǵa, al 30 paıyzy onyń basty qarsylasy – senator Ksochıtl Galveske daýys bergen. 
Enkoll júrgizgen ekzıt-poll uqsas qorytyndy kórsetti: Sheınbaým úshin 57,8% jáne Galves úshin 29,1%.

Meksıkanyń saılaý komıssııasy – Ulttyq saılaý ınstıtýty alǵashqy nátıjelerdi jaqyn saǵattarda jarııalaýǵa ýáde berdi.

61 jastaǵy Klaýdııa Sheınbaýmdy prezıdenttikke qazirgi prezıdent Andres Manýel Lopes Obradordyń bıleýshi Moreno partııasyn qosa alǵanda, quramyna úsh solshyl partııa kiretin Sigamos Haciendo Historia («Tarıhty jasaýdy jalǵastyraıyq») koalıtsııasy usyndy. 

Lopes Obradordyń ózi konstıtýtsııaǵa sáıkes ekinshi merzimge úmitker bola almaıdy, sondyqtan Sheınbaýmdy qoldady.

Mehıko qalasynda evreı otbasynda ósken Sheınbaým alǵash ret fızık retinde tanymal boldy jáne 2007 jyly Klımattyń ózgerýi jónindegi úkimetaralyq toptyń múshesi retinde ujymdyq Nobel beıbitshilik syılyǵyn aldy. 

2000 jyly sol kezdegi Mehıko qalasynyń meri Lopes Obrador Sheınbaýmdy el astanasynyń qorshaǵan ortany qorǵaý jónindegi hatshysy etip taǵaıyndady, al 2018 jyly ol prezıdent saılaýynda jeńiske jetken Obradordyń ornyna mer boldy.

Sheınbaým Lopes Obradordyń saıasatyn jalǵastyrýǵa jáne damytýǵa ýáde beredi. 

Onyń saılaýaldy baǵdarlamasynyń basty tarmaqtarynyń biri – qylmyspen kúres. Mehıko qalasynyń meri retinde ol astanadaǵy kisi óltirý deńgeıin sońǵy úsh onjyldyqtaǵy eń tómengi deńgeıge deıin túsirdi, bul tájirıbeni ol búkil elge taratýdy josparlap otyr.