Meksıkadaǵy Dears qaýymdastyǵyna Dımash týraly 60 kitap tabystaldy
ASTANA. KAZINFORM — «Almaty kitap» baspasynan jaryq kórgen «Sheksiz mýzyka» («Beskonechnaıa mýzyka») atty 60 kitap Almaty qalasynan Meksıkaǵa Dımash Qudaıbergenniń jergilikti jankúıerler qaýymdastyǵyna jetkizildi, dep habarlaıdy dimashnews.
29 tamyzda kitaptar Meksıkadaǵy Qazaqstan elshiliginde meksıkalyq Dears ókilderine resmı túrde tabystaldy.
Kitaptardy tabystaý rásimine Qazaqstannyń Meksıkadaǵy elshisi Almurat Turǵanbekov, dıplomatııalyq ókildik qyzmetkerleri, elshilik keńesshisi Erlan Qubashev, sondaı-aq meksıkalyq Dears qaýymdastyǵynyń ókilderi qatysty. Elshi Dımash Qudaıbergenniń shyǵarmashylyǵyna shynaıy qoldaý kórsetip, Qazaqstanǵa qyzyǵýshylyq tanytyp kele jatqan jankúıerlerge alǵysyn bildirdi.
Kitaptardy tabystaý rásimi Dımashtyń Meksıkada ótetin birqatar kontsertteriniń qarsańynda uıymdastyryldy. Qarasha aıynda óner ıesi Mehıko, Merıda, Monterreı jáne Gvadalahara qalalarynda tórt kontsert ótkizedi. Atalǵan kontsertterge Latyn Amerıkasynyń ózge de elderinen jankúıerlerdiń kelýi kútilýde.
Kontsertter qarsańynda Qazaqstannyń Meksıkadaǵy elshiligi jergilikti aýdıtorııany Qazaqstanmen tanystyrýǵa baǵyttalǵan mádenı bastamalardy odan ári jalǵastyrýdy josparlap otyr. Atap aıtqanda, Dımashtyń kontsertteri ótetin tórt qalada Qazaqstanǵa arnalǵan fotokórmeler uıymdastyrý kózdelýde. Bul bastamaǵa jergilikti Dımash jankúıerleri de qoldaý bildirip otyr.
Kezdesý barysynda Almurat Turǵanbekov qatysýshylarǵa Qazaqstanda júzege asyrylyp jatqan ózgerister men jańǵyrý úderisteri týraly da aqparat berip, eki el arasyndaǵy dostyq qarym-qatynastardy odan ári damytýdyń mańyzdylyǵyn atap ótti.
Elshiniń aıtýynsha, mádenı yntymaqtastyq Qazaqstan men Meksıka halyqtary arasyndaǵy ózara túsinistikti nyǵaıtýda aıtarlyqtaı áleýetke ıe. Osy turǵydan alǵanda, Dımashtyń halyqaralyq deńgeıdegi tanymaldyǵy sheteldik aýdıtorııany Qazaqstanmen, onyń mádenıetimen jáne qazirgi damý úderisterimen tanystyrýdyń mańyzdy múmkindikteriniń birine aınalyp otyr.
Buǵan deıin Dımash Qaraǵandyda shahtaǵa túsip, balalarmen jáne sýretshi Kúıikovpen kezdeskenin jazǵanbyz.
