Meksıkada jolaýshylar ushaǵy apatqa ushyrady
ASTANA. QazAqparat - Aeromexico áýe kompanııasynyń ushaǵy Meksıkanyń Vıktorııa-de-Dýrango qalasy áýejaıynan kóterilgen sátte apatqa ushyrady, dep habarlaıdy bbc.com.
Shtat gýbertatory Dýrango Hose Rosas Aıspýronyń aıtýynsha, jolaýshylardyń bári aman qalǵan.
Jergilikti BAQ jýrnalısteriniń habarlaýynsha, jolaýshylardyń basym bóligi ushaq salonynan ózdiginen shyqqan.
Eldiń densaýlyq saqtaý mınıstrliginiń derekterine qaraǵanda, 85 adam jaraqat alǵan, olar jaqyn jerdegi aýrýhanalarǵa jatqyzyldy.
Bortynda 94 jolaýshy jáne 4 ekıpaj bar Embraer E90 ushaǵy "Heneral Gvadalýpe Vıktorııa" áýejaıynan el astanasy Mehıko qalasyna ushyp shyqqan.
Qutqarýshylar jaralylarǵa kómek kórsetýde.
Ushaq ushý-qoný jolaǵynan kóterile bergen sátte qulaǵan.
OMA Aeropuertos áýejaıy operatory kompanııasynyń málimdeýinshe, apatqa qolaısyz aýa raıy sebep bolýy múmkin.
