Meksıkada jasyrylǵan 240 adamnyń máıiti tabyldy
ASTANA. QazAqparat - Meksıka polıtsııasy Verakrýs shtatynda jappaı qupııa jerlengen 240 adamnyń máıitin tapty, dep habarlaıdy 24.kz.
Telearna saıtynda jarııalanǵan málimetterge qaraǵanda, mamandar ázirge jasyryn oryndardyń tek jartysyn ǵana arshyp, tekserýge kóshken. Sondyqtan qurbandardyń sany budan da kóp bolýy yqtımal.
Alǵashqy saraptamanyń qorytyndysyna qaraǵanda, máıitter negizinen 14 pen 25 jas aralyǵyndaǵy jastarǵa tıesili. Al aqparat quraldarynyń habarlaýynsha, atalǵan shtatta 2010 jyldan beri iz-túzsiz 700-den astam adam joǵalyp ketken. Polıtsııa bul aımaqtaǵy esirtkimen aınalysýshy eki iri toptyń bir-birimen jaýlasýynyń saldary ekenin aıtady.
