Meksıkada jankúıerler qýanyp sekirgende jer silkindi
MEHIKO. QazAqparat - Meksıkalyq jankúıerler Álem chempıonatynda Germanııaǵa toıtarys bergen ulttyq komandanyń jeńisine qatty qýanǵandary sonshalyq, aıaq asty jer silkinisin jasaǵan, dep habarlaıdy The Guardian.
Meksıka 35-mınýtta qazirgi álem chempıondaryna gol salǵan kezde arnaıy qurylǵylar jer silkinisin tirkepti.
Meksıkanyń geologııalyq jáne atmosferalyq zertteýler ınstıtýtynyń sezimtaldyǵy joǵary datchıkteri gol salynǵannan keıin 7 sekýnd ótken soń Mehıko qalasynyń eki aýdanynda jer dúmpýi tirkelgenin rastady.
Jankúıerler eldiń týyn jelbiretip, dástúrli sombrero bas kıimderin kıip shyqqan. Matchty úlken ekrannan kórý úshin myńdaǵan adam qala ortalyǵyndaǵy eskertkishtiń mańyna jınalǵan.
Meksıka Germanııany Máskeýde 1:0 esebimen jeńgen kezde jankúıerler eldegi fýtboldyń beıresmı ánurany, halyq áni «Cielito Lindo»-ny shyrqaı bastaǵan.
Áleýmettik jelilerde de jankúıerler golkıper Gılermo Ochaonyń oıynyn eskerip, onyń Meksıkanyń Prezıdenti retinde beınelengen memderin taratqan.
Aıta keteıik, keshe maýsymnyń 17-sinde Álem chempıonaty aıasyndaǵy kezdesýde Meksıka quramasy Germanııany tize búktirgen edi. Al aldaǵy senbidegi Rostov-na-Doný qalasyndaǵy matchta Meksıka Ońtústik Koreıamen kezdesetin bolady.
