Meksıkada uıymdasqan qylmyspen baılanystary úshin 48 polıtseı tutqyndaldy
ASTANA. Shildeniń 30-y. QazAqparat - Meksıkanyń soltústigindegi Tómengi Kalıfornııa shtatynda uıymdasqan qylmyspen ymyralasqan degen aıyppen 48 polıtsııa qyzmetkeri tutqyndaldy. Beısenbi kúni jergilikti bılik ókilderi habarlaǵandaı, tártip saqshylarynyń «qataryn tazalaý jónindegi» bul operatsııa eldegi sońǵy jyldardaǵy eń úlken is-shara bolyp otyr.
Jemqor polıtseılerdi komıssarıattardyń birine arnaıy kelgen áskerıler tutqyndady. Olarǵa AQSh-pen shekaralas aýdanda áreket etetin qylmystyq toptarǵa kómektesip kelgen degen aıyptar taǵylyp otyr. Jaqyn kúnderi olar Mehıkoǵa jetkiziledi jáne olardyń isterin Bas prokýratýra qaraıtyn bolady.
Meksıkanyń qazirgi prezıdenti Felıpe Kalderon 2006 jyly bılik basyna kelgennen keıin qylmysqa qarsy úlken kúres jarııalap, osy maqsattaǵy is-sharalardy kúsheıtýge 45 myń sarbaz jáne 20 myń polıtsııa qyzmetkerin jasaqtady jáne olar qylmystyq jaǵdaı óte kúrdeli aýdandarǵa jiberildi. Degenmen, jergilikti buqaralyq aqparat quraldarynyń habarlaýynsha, bul shara kútkendeı úlken nátıje bere qoıǵan joq: sońǵy 4 jylda respýblıkada zorlyq-zombylyqtyń saldarynan 25 myńdaı adam qaza bolǵan.
