Meksıkada úkimetke qarsy myńdaǵan adam kóshege shyqty

ASTANA. KAZINFORM — Mehıko qalasynda myńdaǵan kóterilisshiler zorlyq sıpatyndaǵy qylmystarǵa jáne prezıdent Klaýdııa Sheınbaým úkimetine qarsy narazylyq bildirý úshin kóshege shyqty, dep habarlaıdy The Washington Post.

Narazylyq aktsııasyn Z býynynyń jastar toptary uıymdastyrdy, olardy atyshýly kisi óltirý isterine qarsy turǵan azamattar qoldady. Sonyń ishinde birneshe apta buryn Ýrýapan meri Karlos Mansonyń óltirilýi de bar. Ol eldegi esirtki kartelderine qarsy qatań sharalar qabyldaýdy talap etip kelgen.

Prezıdent Sheınbaým basqa qalalarda ótken sherýlerdi onyń úkimetine qarsy turǵan ońshyl saıasatkerler qarjylandyrǵanyn málimdedi.

Senbi kúni demonstranttar Sheınbaým turyp jatqan Ulttyq saraı mańyndaǵy qorshaýdyń bir bóligin buzdy. Keshendi qorǵap turǵan polıtsııa narazy topqa qarsy kózden jas aǵyzatyn gaz qoldandy.

Sherýshiler «Biz bárimiz — Karlos Manzo» degen jazýy bar plakattar ustap, keıbireýleri oǵan qurmet retinde kovboı qalpaǵyn kıdi.

Karlos Manzo 1 qarashada Óliler kúnine arnalǵan festıval kezinde qastandyqpen óltirilgen edi. Ol óz qalasyndaǵy esirtki saýdasy men kartelderdiń zorlyq-zombylyǵy týraly ashyq aıtqan saıasatkerlerdiń biri bolǵan.

Manzo eldi úreıde ustap otyrǵan qarýlanǵan kartel múshelerine qarsy qatań sharalar qabyldaýdy talap etti.

«Prezıdent Sheınbaým esirtki kartelderine qarsy kúres júrgizip jatyr, alaıda esirtkige qarsy jańa, aýqymdy soǵys bastaý týraly talaptardy qabyldamaı otyr. Buǵan deıingi ákimshilikterdiń mundaı áreketteri qandy qaqtyǵystarǵa ákelgen edi», dep jazdy VVS.

Aıta keteıik, Ierýsalımde ýltraortodoks evreıler jappaı narazylyqqa shyqty.

Al Kamerýnda Pol Bııanyń qaıta saılanýy jappaı narazylyq týdyrdy.