Meksıkada túrmeden 85 tutqyn qashyp ketti
ASTANA. Qyrkúıektiń 11-i. QazAqparat - AQSh shekarasyna jaqyn mańda ornalasqan meksıkalyq túrmelerdiń birinen 85 tutqyn qashyp ketti, dep habarlaıdy «RIA «Novostı» agenttigi.
Qashý áreketi juma kúni jergilikti ýaqyt boıynsha tańerteń jasalǵan. Reınos qalasyndaǵy bul túrmede negizinen narkokartelderdiń músheleri otyrady. Meksıka prokýratýrasynyń ókili adamdardyń túrmeden qashý faktin rastaǵanymen, oqıǵanyń mán-jaıyna toqtala qoıǵan joq, dep habarlaıdy Reıter agenttigi.
Jergilikti radıostansa men El Norte gazetiniń polıtsııaǵa silteme jasap habarlaýynsha, qashý oqıǵasy kezinde qyzmette bolǵan túrmeniń 40-tan astam qyzmetkeri qamaýǵa alynǵan. Aqparat kózderi eki kúzetshiniń tabylmaı otyrǵanyn habarlap otyr.
Meksıka Prezıdenti Felıpe Kalderon 2006 jyly bılik basyna kelgennen keıin uıymdasqan qylmysqa jáne esirtki mafııalaryna qarsy soǵys jarııalaǵan bolatyn. Memlekettik qyzmetkerler men polıtsııa sheneýnikteriniń arasyndaǵy tamyryn tereńge jaıǵan sybaılas jemqorlyqty eskere otyryp, ol bul kúreske armııany tartýǵa da májbúr bolǵan edi. Meksıkada 2006 jyldan beri uıymdasqan qylmystyń jáne esirtki mafııalarynyń qolynan 28 myńnan astam adam qaza tapqan.
Sarapshylardyń baǵalaýynsha, jyl saıyn Meksıka aýmaǵy arqyly AQSh-qa, Eýropa men Azııaǵa jalpy somasy 40 mıllıard dollardyń esirtkisi jetkiziledi eken.
