Meksıkada týrıstik avtobýs apatqa ushyrap, keminde 7 adam ajal qushty
ASTANA. KAZINFORM — Senbi kúni Meksıkanyń batysyndaǵy Mıchoakan shtatynda týrıstik avtobýstyń aýdarylýy saldarynan keminde jeti adam qaza taýyp, taǵy birneshe adam jaraqat aldy. Bul týraly jergilikti bılik habarlady, dep jazady Sınhýa.
Shtattyń Bas prokýratýrasy áleýmettik jelilerde avtobýstyń Ýrýapan qalasynan shyǵyp, Tlalpýhaýa mýnıtsıpalıtetine qaraı bet alǵanyn málimdedi. Oqıǵa ornyna tergeýshiler men sot-medıtsınalyq sarapshylar jiberilgen.
Jergilikti buqaralyq aqparat quraldarynyń habarlaýynsha, keminde 20 jolaýshy jaraqat alǵan. Aldyn ala málimet boıynsha, bılik áli apattyń sebebin anyqtamaǵan, tergeý jalǵasyp jatyr.
Meksıkada jol-kólik oqıǵalary ólim-jitimniń negizgi sebepteriniń biri sanalady. Resmı derekterge sáıkes, 2024 jyly el boıynsha 374 949 jol apaty tirkelgen, onyń saldarynan 4 656 adam qaza taýyp, 85 980 adam jaraqat alǵan.
Osydan buryn 9 aıda Ózbekstanda jol apatynan 1300-den astam adam kóz jumǵanyn jazǵan edik.