Meksıkada týrısterge shabýyl jasaldy: jaraqat alǵandar arasynda sheteldikter bar
ASTANA.KAZINFORM - Qarýly adam Mehıko qalasy mańyndaǵy tanymal týrıstik jáne arheologııalyq oryn sanalatyn Teotıýakan pıramıdalarynyń janynda Kanada azamatyn atyp óltirip, kem degende 13 adamdy jaralady, dep habarlaıdy Al Jazeera.
Oqıǵa on shaqty týrıst pıramıdanyń basyna shyqqan kezde boldy.
Shabýylda jaralanǵandar aýrýhanaǵa jetkizildi. Olardyń arasynda Kolýmbııa, Reseı, Kanada, Brazılııa jáne Amerıka Qurama Shtattarynan kelgen týrıster bar. Alǵan jaraqattarynyń kólemi áli belgisiz.
- Zardap shekkender emdelip jatyr, al bul iske Memlekettik qaýipsizdik hatshylyǵy músheleri aralasady, - dep jazdy Meksıka shtatynyń gýbernatory Delfına Gomes Alvares H-tegi málimdemesinde.
Jergilikti bıliktiń málimetinshe, atys jasaǵan adam keıinirek ózine-ózi qol jumsaǵan. Jergilikti prokýrorlar ony Meksıka azamaty Hýlıo Sezar Djasso Ramıres dep tanydy. Onyń bul áreketke qandaı nıetpen barǵany áli belgisiz.
Meksıka prezıdenti Klaýdııa Sheınbaým jaǵdaıdy muqııat baqylap otyrǵanyn jáne onyń úkimeti Kanada elshiligimen baılanysta ekenin málimdedi.
- Men Qaýipsizdik kabınetine bul oqıǵalardy muqııat tergep, barlyq qajetti qoldaýdy kórsetýdi tapsyrdym. Іshki ister jáne mádenıet hatshylyǵynyń qyzmetkerleri jergilikti bılik organdarymen birge kómek kórsetý jáne súıemeldeý úshin oqıǵa ornyna barady, - dep jazdy Sheınbaým.
Buǵan deıin arheologııalyq nysan qyzmetkerleri kelýshiler kirmes buryn qaýipsizdik tekserýlerin júrgizgen, biraq bul tájirıbe sońǵy jyldary toqtatyldy.
Pıramıdalardaǵy atys oqıǵasy Meksıka Amerıka Qurama Shtattary men Kanadamen birlesip ótkizetin álem chempıonatynyń bastalýyna eki aıdan az ýaqyt qalǵanda bolyp otyr.
Aıta keteıik, Aýǵanstandaǵy demalys ornynda qarýly shabýyldan keminde tórt adam qaza tapty.
