Meksıkada saılaýaldy mıtıng kezinde sahna qulap, 9 adam qaza tapty
ASTANA. KAZINFORM – Meksıkanyń soltústigindegi Nýevo-Leon shtatynda saılaýaldy sherý kezinde sahna qulap, kem degende toǵyz adam qaza tapty, onyń ishinde bir bala bar, taǵy 50 adam jaraqat aldy, dep habarlaıdy BBC.
Oqıǵa Azamattyq qozǵalys partııasynan prezıdenttikke kandıdat Horhe Alvares Maınes San-Pedro-Garsa-Garsııa qalasynda sóz sóılep jatqan kezde boldy.
Maınestiń ózi zardap shekken joq, biraq onyń aıtýynsha, onyń komandasynyń birneshe múshesi jaraqat alǵan.
Apatqa kenetten soqqan jel sebep boldy, dep jazdy Maınes áleýmettik jelide.
Sahnada birneshe adam bolǵan kezde jaryqtandyrý konstrýktsııasy qulaǵan sáti túsip qalǵan kadrlar paıda boldy.
Shtat gýbernatory Samýel Garsıa jergilikti turǵyndardy naızaǵaı men qatty jelge baılanysty úıden shyqpaýǵa shaqyrdy.
Meksıka prezıdenti Andres Manýel Lopes Obrador qaza tapqandardyń týystaryna, jaqyndaryna jáne saıası jaqtastaryna kóńil aıtty.
