Meksıkada poıyz avtobýspen soqtyǵysty: 10 adam qaza taýyp, 61 adam jaraqat aldy
ASTANA. KAZINFORM — Meksıkada júk poıyzy joldy kesip ótpek bolǵan eki qabatty jolaýshylar avtobýsymen soqtyǵysty. Saldarynan 10 adam qaza taýyp, 61 adam túrli dárejede jaraqat aldy. Bul týraly Sınhýa habarlady.
Oqıǵa kanadalyq Pacific Kansas City de Mexico temirjol kompanııasyna tıesili poıyzǵa qatysty. Kompanııa oqıǵaǵa baılanysty málimdeme jasap, marqumdardyń týystaryna kóńil aıtyp, júrgizýshilerdi temirjol ótkelderindegi jol belgilerine nazar aýdarýǵa shaqyrdy.
Ǵalamtorda tarap jatqan fotosýretterde avtobýstyń ústińgi palýbasynyń aldyńǵy bóligi tolyǵymen synǵan, al metall konstrýktsııasy qatty zaqymdalǵan. Oqıǵa ornyn tótenshe jaǵdaılar qyzmeti qorshaýǵa aldy. Soqtyǵys el astanasy Mehıkodan 115 shaqyrym jerdegi Atlakomýlko qalasynyń mańyndaǵy ónerkásiptik aýdanda boldy.
Prokýratýranyń málimetinshe, qaza tapqandar arasynda jeti áıel men úsh er adam bar. Zardap shekkenderdiń keıbiri aýyr halde aýrýhanaǵa jetkizildi.
Latyn Amerıkasynda avtobýstardyń qatysýymen bolatyn qaıǵyly oqıǵalar jıi kezdesedi. Meksıka úkimetiniń sońǵy esebine sáıkes, 2023 jyly el joldarynda 12 myńnan astam jol-kólik oqıǵasy bolǵan. Sonyń saldarynan 6 400 adam jaraqat alyp, 1 900 adam qaza tapqan. Tek aqpan aıynda Kankýnnan Tabaskoǵa bara jatqan avtobýs júk kóligine soǵylyp, 40-tan astam adam qaza tapqan bolatyn.
Avtobýstar Meksıkadaǵy jolaýshylardy tasymaldaýdyń negizgi quraly. Elde júk poıyzdary keńinen taralsa, jolaýshylar poıyzdarynyń sany shekteýli. Prezıdent Klaýdııa Sheınbaýmnyń úkimeti Meksıkanyń soltústik jáne ortalyq aımaqtaryn baılanystyratyn jolaýshylar temirjol jelisin keńeıtý boıynsha jumys jasap jatyr.
Eske sala keteıik, Meksıka parlamentinde depýtattar tóbelesti.