Meksıkada «Polo» daýyly soǵyp, jaǵalaý óńirlerin sý basty
ASTANA. KAZINFORM – Meksıkanyń Ońtústik Tómengi Kalıfornııa aımaǵyna ekinshi deńgeıli «Polo» daýyly soǵyp, arty nóser jaýyn men sý tasqynyna ulasty. Bul týraly BELTA habarlaıdy.
Qýatty daýyl seısenbi kúni Las-Barrankastan sál ońtústikke qaraı, Kabo-San-Lasarodan shamamen 130 shaqyrym soltústiktegi aýmaqqa jetti. Jel ekpini saǵatyna 175 shaqyrymǵa deıin kúsheıdi.
Seısenbi kúni shamamen 700 turǵyn qaýipsiz jerlerge ornalastyryldy. Degenmen, kóp uzamaı olardyń úılerine qaıtýyna jaǵdaı jasalady dep úmit boldy. Bılik ókilderiniń málimetinshe, sol ýaqytqa deıin ǵımarattardyń qıraǵany nemese adam shyǵyny bolǵany týraly aqparat túspegen.
Sınoptıkterdiń boljamynsha, «Polo» daýyly Ońtústik Tómengi Kalıfornııanyń keıbir aýdandarynda 15-30 santımetrge deıin jaýyn-shashyn túsirýi múmkin.
«Polo» daýyly seısenbi kúni Kalıfornııa shyǵanaǵynan ótip, ekinshi márte Meksıka jaǵalaýyna jetti. Bul joly daýyl Sonora shtatyna baǵyt aldy.
Sınoptıkter «Polo» daýyly jaǵalaýǵa jetkennen keıin adam ómirine qaýip tóndiretin qatty jel soǵyp, aıaq astynan sý basýy múmkin ekenin eskertti. Osyǵan baılanysty Sonora bıligi shtat astanasy men onnan astam eldi mekende mektepterdegi sabaqty, sporttyq sharalardy jáne kúndelikti tirshilikke asa qajet emes jumystardy ýaqytsha toqtatty.
Al daýyldardy ulttyq baqylaý ortalyǵynyń málimetinshe, «Reıchel» tropıkalyq daýyly seısenbi kúni tańerteń Meksıka jaǵalaýyna qatarlasa jyljyp bara jatqan. Daýyl Lasaro-Kardenastan shamamen 425 shaqyrym jerde ońtústik-batysta bolǵan. Jeldiń turaqty jyldamdyǵy saǵatyna 105 shaqyrymǵa deıin jetken. Daýyl batys-soltústik-batys baǵytynda saǵatyna shamamen 20 shaqyrym jyldamdyqpen jyljyǵan.
Buǵan deıin Japonııada taıfýnnan 12 adam qaza taýyp, taǵy úsh adam iz-túzsiz joǵalǵany habarlanǵan bolatyn.
