Meksıkada nóser jaýyn saldarynan mert bolǵandar sany 64-ke jetti

ASTANA. KAZINFORM – Meksıkada nóser jaýyn saldarynan bolǵan sý tasqynynan qaza bolǵandar sany 64–ke jetti. Taǵy 65 adam iz-túzsiz ketkender qatarynda, dep habarlaıdy Anadoly.

Ulttyq azamattyq qorǵaý úılestirý basqarmasy (CNPC) taratqan málimetke sáıkes, ótken aptadan beri «Prıstsılla» men «Raımond» tropıkalyq daýyldarynyń áserinen bolǵan nóser jańbyr saldarynan qaza tapqandar sany artqan.

Agenttiktiń habarlaýynsha, eń kóp adam shyǵyny men iz-túzsiz joǵalý jaǵdaılary Verakrýs, Pýebla, Idalgo, Keretaro jáne San-Lýıs-Potosı shtattarynda tirkelgen.

Meksıka prezıdenti Klaýdııa Sheınbaým Ulttyq saraıda ótken kúndelikti baspasóz máslıhatynda zardap shekken aımaqtarǵa kómek kórsetý úshin qutqarý toptary jumyldyrylǵanyn aıtty.

Onyń málimdeýinshe, sý basqan óńirlerge kıim-keshek, gıgıenalyq quraldar, aýyzsý men azyq-túlikti jetkizý jumystaryn jedeldetý úshin qosymsha toptar jiberilgen.

«Biz qalpyna keltirý jáne tabıǵı apattan zardap shekkenderdi qoldaý sharalaryn tolyq júzege asyramyz», — dedi Sheınbaým.

Meksıkalyq BAQ derekterine súıensek, sońǵy jyldardaǵy eń iri sý tasqyny saldarynan zardap shekkender sany 250 myńnan asyp, 50 myń úıdiń búlingeni anyqtalǵan.

Osyǵan deıin Meksıkada nóser jaýyn saldarynan qaza tapqandar sany 41-ge jetkeni týraly jazdyq.