Meksıkada «Marı» daýylynan 10 myń januıa zardap shekti
ASTANA. QazAqparat - Meksıkada Tynyq muhıty jaǵalaýynyń boıymen AQSh-qa bet alǵan "Marı" daýylynan 10 myń januıa zardap shekti, dep jazady sheteldik BAQ.
Eldiń ońtústik batysynda ornalasqan Oahaka shtatynyń eń kóp zardap shekken 10 mýnıtsıpalıtetinde tótenshe jaǵdaı jarııalandy.
Daýyl epıtsentrindegi jel jyldamdyǵy qazirgi ýaqytta saǵatyna 230 kılometrdi quraıdy. Alaıda meteorologtar "Marı" sál báseńdep kele jatqanyn habarlaǵan.
Meksıkanyń batys jaǵalaýy ótken jyldyń qyrkúıeginde "Manýel" daýylynan qatty zardap shekken. Sol kezde, elde resmı derekter boıynsha, 157 adam qaza tapqan. Infraqurylymǵa da biraz zııan tıgen edi.
