Meksıkada qus tumaýynan alǵashqy ólim jaǵdaıy tirkeldi
ASTANA. KAZINFORM – Meksıkada qus tumaýynyń H5N2 shtamyn juqtyrǵan alǵashqy jaǵdaı tirkeldi. Bul álem boıynsha zerthanada rastalǵan tuńǵysh oqıǵa, dep habarlaıdy ABC News.
Dúnıejúzilik densaýlyq saqtaý uıymy sársenbide Meksıkada qus tumaýy túrinen alǵash ret ólim jaǵdaıy tirkelgenin rastady.
Vırýstan qaıtys bolǵan 59 jastaǵy turǵyn úı qustarymen nemese basqa janýarlarmen baılanysta bolmaǵan.
Osy jyldyń 17 sáýirinde naýqastyń dene qyzýy kóterilip, júrek aıný, dıareıa, entigý jáne jalpy álsizdik paıda boldy. 24 sáýir kúni ol Mehıkodaǵy Ulttyq respıratorlyq aýrýlar ınstıtýtyna jatqyzylyp, sol kúni qaıtys boldy.
DDU málimetinshe, naýqastyń týystary onyń qosymsha aýrýlary bar ekenin habarlady: buǵan deıin oǵan sozylmaly búırek aýrýy, 2 tıpti qant dıabeti jáne gıpertenzııa dıagnozdary qoıylǵan.
Synaq qorytyndylary patsıenttiń H5N2 kishi tıpti qus tumaýyn juqtyrǵanyn kórsetti, ol buryn adamdarda tirkelmegen.
Uıym málimetinshe, densaýlyq saqtaý qyzmetkerleri júrgizgen tergeý barysynda jańa jaǵdaılar tirkelmegen. Naýqaspen baılanysta bolǵan adamdardyń barlyq synaqtary H5N2 tumaýy men COVID-19 úshin teris nátıje kórsetti.
Dúnıejúzilik densaýlyq saqtaý uıymynyń málimeti boıynsha, jalpy halyq úshin aýrý juqtyrý qaýpi tómen. Bul shtamm qazirgi ýaqytta AQSh-ta mal arasynda taralyp jatqan jáne Tehas pen Mıchıgandaǵy úsh sút fermasynda tirkelgen qus tumaýynyń «H5N1» shtamynan erekshelenedi.
