Meksıkada krematorııden 383 adamnyń máıiti tabyldy

ASTANA. KAZINFORM — AQSh-pen shekara mańynda ornalasqan Meksıkanyń Sıýdad-Hýares qalasyndaǵy krematorıılerdiń birinen 383 adamnyń súıegi tabyldy. Jergilikti bıliktiń habarlaýynsha, bul mekeme qaladaǵy alty túrli jerleý bıýrosyna qyzmet kórsetken, dep habarlaıdy Anadolu. 

Chıýaýa shtaty prokýratýrasynyń málimetinshe, tekserý belgisiz bireýdiń anonımdi qońyraý shalǵanynan keıin bastalǵan. Krematorıı ǵımaratyna júrgizilgen tintý barysynda júzdegen máıitpen qatar, ózge de adam qaldyqtary anyqtalǵan. Aldyn ala derekter boıynsha, olardyń bir bóligi bul jerde 3-4 jyldan beri saqtalyp kelgen.

Shtat prokýrory Sesar Haýregı Morenonyń aıtýynsha, tabylǵan máıitterdiń sany bul mekemeniń krematsııa qyzmetin shyn máninde atqarǵanyna kúmán keltiredi. 

— Bul adamdardyń bárine jerleý rásimderi ótkizilgen. Alaıda shyn mánindegi maqsat ne bolǵanyn eshkim bilmeıdi, — dedi ol.

Jergilikti BAQ-tyń habarlaýynsha, krematorııdiń barlyq qajetti lıtsenzııasy bolǵanymen, ol jumys tártibine qoıylǵan talaptardy óreskel buzǵan. Qazirgi tańda mekeme jabylyp, onyń ıesi men bir qyzmetkeri qamaýǵa alynǵan.

Chıýaýa shtatynyń gýbernatory Marý Kampos krematorıı qyzmetkerlerin «jaýapsyz ári tasjúrek adamdar» dep atap, olardyń lıtsenzııa men ruqsattardy óz paıdasyna zańsyz paıdalanǵanyn aıtty.

Bılik atalǵan krematorııde osynshama kóp máıittiń ne sebepti saqtalǵanyn anyqtaý maqsatynda tergeýdi jalǵastyryp jatyr. Mekeme qaladaǵy birneshe jerleý agenttigine qyzmet kórsetken.

Aıta keteıik, mamyr aıynda Meksıkada merlikke kandıdat saılaý aldyndaǵy sherý kezinde atyp óltirilgenin jazǵan edik.