Meksıkada Frıda Kaloǵa arnalǵan jańa mýzeı ashylady

ASTANA. KAZINFORM — Kórnekti sýretshi Frıda Kalonyń ómiri men shyǵarmashylyǵyna arnalǵan jańa Museo Casa Kahlo mýzeıi bıyl kúzde Mehıko qalasynyń Koıoakan aýdanynda ashylady, dep habarlaıdy AZERTADJ.

Agenttik sheteldik BAQ-qa silteme jasap habarlaǵandaı, Rockwell Group kompanııasy jobalaǵan bul mýzeı Casa Roja dep atalatyn ǵımaratta ornalasady. Bul — Kalonyń ata-anasy satyp alyp, keıin Frıda men onyń ápkelerine bergen jeke rezıdentsııasy. Jańa mýzeı sýretshi uzaq jyldar ómir súrgen úıdegi qazirgi Frıda Kalo mýzeıiniń janynda boı kótermek.

Qazirgi Frıda Kalo mýzeıi sýretshiniń ómiri men onyń jubaıy Dıego Rıveramen qarym-qatynasyn baıandaıdy. Al jańa Museo Casa Kahlo onyń balalyq shaǵy men shyǵý tegine tereńirek úńiletin bolady.

Jańa mýzeıdiń dırektory retinde qazir Mehıkodaǵy Jad pen tózimdilik mýzeıiniń akademııalyq dırektory qyzmetin atqaratyn Adan Garsııa Fahardo taǵaıyndaldy.

Museo Casa Kahlo-da buryn-sońdy kópshilikke kórsetilmegen jeke zattar — hattar, bala kezindegi sýretter, qýyrshaqtar, áshekeı buıymdar, kıimder men Frıdanyń alǵashqy kartınasy qoıylady.

Casa Roja ǵımaratyn mýzeıge sýretshiniń nemere sińlisi ári murageri Mara Romeo Kalo tabystaǵan.

— Bul — bizdiń otbasymyzdyń kópten bergi armany. Frıdanyń murasy búkil álemge tıesili, biraq onyń bastaýy osy jerde — osy úılerde jáne ony qalyptastyrǵan mádenıette jatyr. Bul mýzeı bizge jańa oqıǵalardy aıtyp, otbasylyq qupııalarmen bólisýge, jańa daýystardy qabyldaýǵa jáne onyń rýhyn qurmetteıtin bolashaqty qurýǵa múmkindik beredi, — dedi Maro Romeo.

Mýzeıdiń qurylýy, ashylýy jáne jumys isteýi Nıý-Iorkte ornalasqan, Kalo otbasy qurǵan jańa kommertsııalyq emes uıym — Fundación Kahlo-nyń baqylaýynda bolady.

Museo Casa Kahlo resmı túrde 27 qyrkúıekte ashylady.

Buǵan deıin Meksıka Google korporatsııasyn sotqa bergenin jazǵanbyz.