Meksıkada eń atyshýly narkobaronnyń qaıynatasy qolǵa tústi
ASTANA. 2 mamyr. QazAqparat - Meksıka polıtseıleri «Sınaloa» karteliniń basshysy Hoakın Gýsmannyń qaıynatasyn qolǵa túsirdi. Bul týraly Associated Press-ke silteme jasap, Lenta.rý habarlaıdy.
Agenttiktiń habarlaýynsha, 45 jastaǵy Ines Koronel Barreras Sonora shtatynyń soltústiginde, Arızonamen shekaralas ornalasqan Agýa-Prıeta qalasynda qolǵa túsken. Polıtsııanyń málimetinshe, qylmysker men onyń balasyn jáne taǵy úsh sybaılasyn ustaý kezinde birde-bir oq atylmaǵan.
Barreras ustalǵan úıden polıtsııa qyzmetkerleri 4 avtomat, tapansha jáne 250 keli marıhýana tárkilegen.
Barreras Gýsmannyń 2007 jyly úılengen úshinshi áıeliniń ákesi. Úkimettiń málimetinshe, Barreras kartelde mańyzdy orynǵa ıe jáne Meksıkadan Arızonaǵa ótkiziletin marıhýanany baqylaıdy.
«Qaratyshqan» («El Chapo») atty laqap atpen belgili Hoakın Gýsman AQSh-tyń esirtki qylmysyna qarsy kúres basqarmasynyń derekteri boıynsha álemdegi eń kóp izdestirilýdegi esirtki satýshy. 1990-jyldardyń basynan beri osy narkobaronnyń basqarýyndaǵy «Sınaloa» karteli Meksıkadan AQSh-qa jetkiziletin esirtkiniń úshten birin baqylaýda ustap keledi. Gýsman 2001 jyly 20 jyldyq jazasyn ótep jatqan erekshe qorǵaýdaǵy túrmeden qashyp shyǵyp, sodan beri eshkimge ustatpaı kele jatqan kórinedi.
