Meksıkada Dımash Qudaıbergenniń áýe sharlarynan 4,5 metrlik músini jasaldy
ALMATY. KAZINFORM — Dımash Qudaıbergenniń Latyn Amerıkasy elderine josparlanǵan kontserttik týry qarsańynda ánshiniń Meksıkadaǵy jankúıerleri erekshe shyǵarmashylyq jobany júzege asyrdy.
Meksıkalyq Dears qaýymdastyǵynyń múshesi, áýe sharlarynan kórkem músinder jasaýmen aınalysatyn sýretshi Olga Lıdııa Ernandes shyǵarmashylyq tobymen jáne Dimash & Dears Regias fan-klýbynyń qatysýshylarymen birlesip, Dımash Qudaıbergenniń bıiktigi 4,5 metr bolatyn músinin jasaǵan.
Kórkem ınstallıatsııa Monterreı qalasyndaǵy (Nýevo-Leon shtaty) iri saýda ortalyqtarynyń birinde ornatyldy. Dál osy qalada 2026 jylǵy 14 qarashada Dımashtyń DiMENSIONS jańa álemdik týry aıasyndaǵy kontserti ótedi.
Uıymdastyrýshylardyń aıtýynsha, jobanyń negizgi maqsaty – qala turǵyndaryn qazaqstandyq ónerpazdyń shyǵarmashylyǵymen tanystyrý jáne aldaǵy kontsertke kópshiliktiń nazaryn aýdarý. Erekshe músin qazirdiń ózinde saýda ortalyǵyna kelýshilerdiń qyzyǵýshylyǵyn týdyryp, Dımash Qudaıbergenniń Monterreı qalasyna aldaǵy saparynyń jarqyn sımvolyna aınalyp otyr.
Aıta ketelik Dımashtyń ánderi Meksıkadaǵy FIFA Fan Fest festıvalinde shyrqalǵan edi.
