Meksıkada Dımash Qudaıbergenge arnalǵan mýral paıda boldy
ASTANA. KAZINFORM — Meksıkanyń Nýevo-Leon shtatyndaǵy Monterreı qalasynda qazaqstandyq ánshi Dımash Qudaıbergenge arnalǵan mýral salyndy, dep habarlaıdy dimashnews.
Erekshe týyndyny jergilikti jankúıerler súıikti ánshisine arnaǵan syı retinde tartý etti. Olardy Dımashtyń shyǵarmashylyǵyna degen ortaq súıispenshilik biriktirgen.
Bastamany Dimash&DearsRegiasMty fan-klýbynyń músheleri Meksıkalyq Dears por Dimash alıansynyń qoldaýymen júzege asyrdy. Mýraldyń avtory — Antonio Art Mural shyǵarmashylyq atymen tanymal sýretshi Antonıo.
Dımashtyń úlken portreti Monterreıdiń ortalyǵyndaǵy Francisco Javier Mina 1140, Centro mekenjaıynda ornalasqan. Endi qala turǵyndary men qonaqtary meksıkalyq Dears-tiń qazaqstandyq óner ıesine degen yqylasyn beıneleıtin týyndyny tamashalaı alady.
Fan-qoǵamdastyq ókilderiniń aıtýynsha, mýraldyń olar úshin mańyzy zor. Bul — súıikti ánshiniń jaı ǵana portreti emes, onyń ónerine degen shynaıy rızashylyq pen Meksıka jáne Qazaqstan arasyndaǵy mádenı baılanystyń sımvoly.
— Bizdiń oıymyzsha, bul kórkem týyndy jaı ǵana vızýaldy arnaýdan áldeqaıda mańyzdy. Ol — meksıkalyq jankúıerlerdiń, ásirese Monterreıdegi Dears qaýymdastyǵynyń shynaıy súıispenshiligi men qurmetiniń kórinisi. Biz Dımash pen onyń Otany — Qazaqstan arqyly qalyptasqan óner jáne mádenı baılanysymyzdy aıshyqtaǵymyz keledi, — dep bólisti Dears por Dimash Meksıkalyq alıansynyń ókilderi.
Mýraldyń salynýy Dımash Qudaıbergenniń Monterreıde ótetin kontserti qarsańynda erekshe mańyzǵa ıe bolyp otyr. Ánshiniń DIMENSIONS álemdik týry aıasyndaǵy kontserti 14 qarashada ótedi.
Jankúıerler ózderiniń shyǵarmashylyq syıy eki el arasyndaǵy dostyqtyń taǵy bir nyshanyna aınalyp, óneri búkil álem tyńdarmandaryn biriktiretin qazaqstandyq ánshini Meksıka turǵyndaryna keńinen tanystyrady dep úmittenedi.
Osydan buryn meksıkalyq jankúıerler Dımash Qudaıbergenge mýzykalyq tosynsyı jasaǵanyn jazǵanbyz.
