Meksıkada daýyldyń kúsheıýi saldarynan jaǵalaýdan 50 myń adam qaýipsiz jerge kóshirilýde
ASTANA. QazAqparat - Meksıka beısenbide «Patrısııa» daýyly jaqyndap kele jatqanyna oraı tynyq muhıt jaǵalaýynan adamdardy kóshirý qajettigin habarlady.
Qyzmettiń ulttyq úılestirýshisi Lýıs Felıp Pýenteniń aıtýynsha, Halısko, Naıarıt jáne Kolıma shtattarynda bılik shamamen 50 myń adamdy qaýipsiz jerge kóshirýdi bastady, dep habarlady RIA «Novostı» .
«Daýyl Pýerto-Valıarta qalasyna jáne Kolıma, Halısko, Naıarıt shtattaryna shyǵyn ákeletinin baıqap otyrmyz, sebebi jeldiń kúshi saǵatyna 280 shaqyrymǵa jetkenimen qoımaı, daýyldyń qýattylyǵy jaýyn-shashynnyń da qarqynyn kúsheıte túsýde», degen Pýente sózin keltirdi El Universal portaly.
«Patrısııa» daýyly tórtinshi sanatqa deıin artty. Qazir onyń kindigi Mıchoakan shtatynan 385 shaqyrymda, Kolıma jaǵalaýynan 445 shaqyrymda. Jeldiń kúshi saǵatyna 215 shaqyrymǵa jetti.
Ol daýyl besinshi sanatqa deıin kóteriletinin atap ótti. Alaıda Meksıka aýmaǵyna jetkende úshinshi sanatqa tómendeýi múmkin.
Jeldiń kúshi saǵatyna 119 shaqyrymnan assa, daýyl quıynǵa aınalady. Besinshi sanatty daýylda jel saǵatyna 250 shaqyrymǵa jetedi. Mundaı jaǵdaı apatty saldarǵa ákelýi múmkin.
