Meksıkada bolǵan kólik apatynan qaza tapqandar sany 27-ge jetti
ASTANA. QazAqparat - Meksıkanyń ortalyǵyndaǵy Sakatekas shtatynda júk kóliginiń qatysýymen bolǵan apattan qaza tapqandar sany 27-ge jetti, olardyń 6-aýy - balalar, dep habarlaıdy TASS.
Jergilikti ýaqyt boıynsha sársenbi kúni qalanyń Masapıl aýdanynda qum tıegen júk kóligi Áýlıe Grıgorıı shirkeýine bet alǵan bir top adamǵa kelip soǵylǵan. Oqıǵa saldarynan jalpy sany 150 adam japa shekken. Aımaqtyq aýrýhanada 46 adam jatyr, onyń 34-iniń hali aýyr.
Shtat gýbernatory Mıgel Alonso Reıestiń aıtýynsha, barlyq japa shekkenderdiń em-domyn memleket kóteredi.
Osy oqıǵaǵa baılanysty Meksıka prezıdenti Enrıke Penıa Neto qurban bolǵandar men japa shekkenderdiń týǵan-týystaryna kóńil aıtty.
Belgili bolǵandaı, kólik júrgizýshisi jyldamdyqty asyryp jibergen, sonyń saldarynan basqarýǵa ıe bola almaı qalǵan. Keıin ol oqıǵa ornynan izin sýytqan. Qazir izdestirý júrgizilip jatyr.
