Meksıkada belgisiz bireýler 16 adamdy óltirip ketti
NUR-SULTAN. QazAqparat – Meksıkanyń ortalyǵyndaǵy Sakatekas shtatynda eki jappaı kisi óltirý oqıǵasy tirkeldi. Jalpy sany 16 adam óltirildi, dep senbi kúni Twitter-de jergilikti prokýratýra jazdy.
«Fresnılo jáne Panfılo-Natera mýnıtsıpalıtetterinde 10 jáne 6 adamnyń múrdesi tabyldy», - delingen habarlamada. Bılik ókilderi tergeý amaldaryna kirisip ketti.
«Tergeý barysy jaıly aqparat tek resmı arnalar arqyly taratylady», - dep eskertti vedomstvoda. Oqıǵaǵa ne sebep bolǵany jarııalanǵan joq.
Sakatekaste «Sınaloa» jáne «Halıskonyń jańa býyny» esirtki kartelderi arasynda janjal birneshe jyldan beri jalǵasyp keledi. Bul shıelenis aımaqtaǵy zorlyq-zombylyqtyń kúrt ósýine ákep soqtyrdy. 2019 jyly óńirde qylmyskerler qolynan 700 adam kóz jumǵan bolsa, 2021 jyly 1,6 myń adam mert boldy. Bılik ókilderiniń baǵamdaýynsha, bul kisi óltirý oqıǵalarynyń 90%-dan astamy uıymdasqan qylmystyq toptyń moınynda.
2021 jyly Meksıkada 33 308 adam óltirilgen. Bir jyl buryn tsıfra budan 1 246-ǵa kóp bolǵan. Ulttyq statıstıka jáne geografııa ınstıtýtynyń zertteýine sáıkesǵ elde eresekterdiń 65,8% turǵylyqty jerinde ózin qaýipsiz sezinbeıdi. Al Sakatekastaǵy Fresnılo qalasynda bul kórsetkish 96,8%-ǵa jetken.
