Meksıkada «Áıelder arasyndaǵy GGG»-diń aıqasy ótedi
ASTANA. QazAqparat - Jeńil salmaqtaǵy qazaqstandyq boksshy Aıda Satybaldınova (3-1-1) 30 qyrkúıek kúni tańerteń kásipqoı rıngtegi óziniń kezekti aıqasyn ótkizedi, dep habarlaıdy QazAqparat.
«Qazaqstan kásipqoı boksy» VKontakte áleýmettik jelisinde málim etkendeı, shetelde «Ledı Sparta» jáne «Áıelder arasyndaǵy GGG» laqap attarymen tanymal Aıdanyń jekpe-jegi Meksıkanyń Tıhýana qalasynda ótedi. Onyń qarsylasy jergilikti sportshy Veronıka Valtıerra. Valtıerra úshin bul profırıngtegi alǵashqy aıqas.
Búgin boksshy qyzdardyń salmaq ólsheý rásimi ótti. Satybaldınova Instagramdaǵy paraqshasynda erteńgi jekpe-jekke daıyndyǵyna qatysty pikirin bildirdi.
«Aıqasqa daıynmyn. Meksıkada judyryqtasý unaıdy. Sebebi meksıkalyqtar judyryqtasýdan taısalmaıdy! Erteń qaıtyp oralǵanymdy jáne burynǵydan myqtyraq ekenimdi kórsetemin», - dep jazdy ol.
Eske salaıyq, qazaqstandyq boksshy qyz sońǵy ret rıngke 7 shilde kúni AQSh-tyń Korpýs-Krıstı qalasynda shyqqan bolatyn. Ol kezde amerıkalyq Selıny Barrıostan (4-0, 2KO) nokaýtpen jeńilgen edi.
Keıin sportshy bul jeńilis alańǵasarlyqtan bolǵanyn jáne oǵan ózi kináli ekenin aıtty.
