Meksıkada avtobýs aýdarylyp, 18 adam qaza tapty

ASTANA. KAZINFORM – Meksıkanyń Oahaka shtatynda jolaýshylar avtobýsy aýdarylyp, 18 adam qaza tapty, 29 adam jaraqat aldy, dep jazady Anadoly.

Shtat gýbernatory Salomon Hara el astanasy Mehıkodan kele jatqan avtobýstyń Mıtla-Teýantepek tas jolynda apatqa ushyraǵanyn málimdegen.

Onyń aıtýynsha, 29 adam zardap shekken, ekeýiniń jaǵdaıy aýyr. Barlyq jaralanǵandar aýrýhanalarǵa jetkizilgen.

Gýbernator qaza bolǵandardyń týystaryna kóńil aıtyp, apattyń sebepteri anyqtalatynyn atap ótti.

Jergilikti baspasózdiń habarlaýynsha, qaza tapqandar bıleýshi «Ulttyq jańǵyrý qozǵalysy» (MORENA) partııasynyń jaqtastary bolǵan. Olar jeksenbi kúni Mehıkodaǵy prezıdent Klaýdııa Sheınbaýmnyń mıtıngisinen qaıtyp kele jatqan.

Aıta keteıik, Túrkııanyń soltústik-batysynda jol apatynan 37 adam zardap shekkenin jazǵan edik.

26 aqpan kúni Taılandtyń Bangkok qalasynan shyǵysqa qaraı ornalasqan Prachınbýrı provıntsııasynda týrıstik avtobýs aýdarylyp, 18 adam qaza taýyp, 23 adam jaraqat aldy.