Meksıkada adamdar jappaı jerlengen 60 qorym tabyldy

Olar ótken jyldyń qyrkúıek aıynda joǵalyp ketken 46 stýdentti izdeý kezinde anyqtaldy. Jalpy alǵanda, bul qorymdardan 129 adamnyń múrdesi tabylǵan.

Bul aqparatty Assoshıeıted press agenttiginiń resmı suraýynan keıin Meksıkanyń bas prokýratýrasy jarııalady.

Narazylyq sharalaryna belsendi qatysqan stýdentter ótken jyly 26 qyrkúıek kúni Igýala qalasynda polıtsııamen bolǵan qaqtyǵystardan keıin joǵalǵan.

Sherýge qatysqandardyń kóbin polıtsııa alyp ketken, tergeý málimetterinshe, ol keıbir stýdentterdi esirtki karteliniń sodyrlaryna tapsyrǵan.

Meksıkanyń bılik kózderiniń aqparatynsha, stýdentter óltirilip, olardyń múrdeleri joıylýy múmkin. Osy ýaqytqa deıin tek bir adamnyń múrdesi tanyldy.

Qaqtyǵys saldarynan barlyǵy alty adam óltirilip, 17 adam jaraqattandy, 57 adam iz-túzsiz joǵalǵan, sonyń ishinde 14-i keıin úılerine oraldy.

Túsinikteme bergen tártip saqshylary stýdentterge shabýyldy olardyń narazylyq uıymdastyrýda belsendiligin unatpaǵan qala meri tapsyrǵanyn aıtady.