Meksıkada adam denesiniń bólikteri salynǵan 45 qap tabyldy
Jergilikti bılik máıitterdi ótken aptada iz-túzsiz joǵalyp ketken koll-ortalyqtyń jeti qyzmetkerin izdep jatqanda tapty.
Qaptarda áıel men er adamdardyń súıegi bar, naqty sany ázirge belgisiz.
Jergilikti jerdiń bederi qıyn ári jaryq bolmaǵandyqtan izdeý jumysy birneshe kúnge jalǵasady degen boljam bar.
Batystaǵy Halısko shtatynyń memlekettik prokýratýrasy jeti adamnyń joǵalǵany týraly aqparat túskennen keıin Mırador-del-Boske saıyna tintý júrgizgenin málimdedi. Sol jerden dene bólikteri salynǵan qap tabyldy.
Jergilikti órt sóndirý jáne azamattyq qorǵanys qyzmeti polıtsııamen jáne tikushaq ekıpajymen birlesip qaldyqtardy joıýmen aınalysty.
Birinshi qap seısenbi kúni tabyldy, biraq aımaqtyń bederi kúrdeli bolǵandyqtan ári kún sáýlesi túspegendikten izdeý jumystary sársenbi kúni jalǵasty. Barlyq súıek tabylǵansha izdeý jalǵasa beredi, dep habarlady prokýratýra.
Máıitter sany, olardyń kim ekeni jáne ne úshin qaza tapqanyn anyqtaý jalǵasady.
Sondaı-aq jergilikti bılik iz-túzsiz joǵalǵan jeti adamdy izdeýdi de jalǵastyra beredi.
Máıitterdiń saıǵa qalaı tastalǵany ázirge belgisiz, alaıda Meksıkada adamdar jıi joǵalady. Mundaı qylmys túri Meksıkada keń taraǵan.
Resmı derekter boıynsha, Meksıkada 100 000-nan astam adam iz-túzsiz joǵalǵandar qatarynda, olardyń kóbi uıymdasqan qylmys qurbandary bolǵan. Qylmyskerlerdiń jazalanýy da sırek qubylys.
Úkimet deregi boıynsha, joǵalyp ketý jaǵdaılary 2007 jyldan, sol kezdegi prezıdent Felıpe Kalderon «esirtkimen kúres» jarııalaǵannan keıin bastalǵan.
Іz-túzsiz joǵalǵandardyń úshten tórt bóligi er adam, al besten biri joǵalǵan kezde 18 jasqa tolmaǵan qyz bala bolǵan.
Joǵalǵan azamattardyń týystary úkimet olardy tabý úshin eshqandaı kúsh jumsamaıtynyna, olardyń qaıǵysyna beı-jaı qaraıtynyna ókpeli.
Meksıkanyń Halısko shtaty narkokartelderdiń qanquıly soǵys ortalyǵyna aınalǵan. Al onda áreket etetin eń yqpaldylary - «Novoe pokolenıe Halısko» jáne Nueva Plaza toptary.