Meksıkada A/H1N1 tumaýyna qarsy jappaı egý bastalady
ASTANA. Qarashanyń 24-i. QazAqparat - Aldaǵy beısenbi kúni Meksıkada A/H1N1 tumaýyna qarsy jappaı egý bastalady, dep habarlady jýrnalısterge eldiń densaýlyq saqtaý mınıstri Hose Anhel Kordova.
«Biz A/H1N1 tumaýyna qarsy vaktsınanyń alǵashqy partııasyn - 865 myń dozasyn aldyq, beısenbi kúni jappaı egýge kirisemiz. Vaktsına birinshi kezekte, medıtsınalyq qyzmetkerler men júkti áıelderge egiletin bolady»,- dep málim etti mınıstr.
Meksıkanyń densaýlyq saqtaý mınıstri sondaı-aq, vaktsınanyń kelesi partııasy - 750 myń doza - elge jeltoqsan aıynyń alǵashqy kúnderi jetkiziletinin habarlady.
Meksıka Eýropadan 153 mıllıon dollar somaǵa A/H1N1 tumaýyna qarsy 30 mıllıon doza vaktsına satyp alyp otyr. Hose Anhel Kordovanyń aıtýynsha, Meksıka halqyna vaktsına tegin egiledi.
A/H1N1 tumaýynyń alǵashqy oqıǵasy Meksıkada aǵymdaǵy jyldyń naýryz aıynda anyqtalǵan edi. Sodan beri elde A/H1N1 tumaýynan 573 adam kóz jumdy, al jańa vırýspen aýyrýdyń zerthanalyq jolmen rastalǵan oqıǵalary 64 myń 322-ge jýyqtap otyr.
